Саха Өрөспүүбүлүкэтин Судаарыстыбаннай Мунньаҕын (Ил Түмэн) норуодунай дьокутаата Елена Голомарева бүгүн Үрдүкү муусука оскуолатыгар ыытыллыбыт үөрүүлээх тэрээһиҥҥэ кытынна.
Кини эҕэрдэ тылыгар иһитиннэрбитинэн, Үрдүкү муусука оскуолата — өрөспүүбүлүкэ киэн туттар кыһата! Саха Сирин Бастакы Бэрэсидьиэнэ М.Е. Николаев, бу оскуоланы тэрийиини көҕүлээччи быһыытынан, саха ыччатын инники кэскилин, култуураны уонна ускуустубаны сайыннарыыны үйэлэргэ өтө көрбүтэ. Бүгүн оскуола выпускниктара дойдуга уонна аан дойдуга Саха Сирин чиэстээхтик көмүскүүллэр.
— Билигин Үрдүкү муусука оскуолата дойду Бэрэсидьиэнэ В.В. Путин ураты болҕомтотугар сылдьар. Кини сорудаҕынан камернай саалалар ирдэбиллэригэр эппиэттиир аныгы таас дьиэ тутулла турар, саҥа муусука үнүстүрүмүөннэрэ уонна оборудование атыылаһылынна. Саҥардыллыбыт утуйар куорпустар оҕолору да, төрөппүттэри да олус үөрдэллэр, — диэн дьокутаат бэлиэтээтэ. -- Өрөспүүбүлүкэбит култууратын уонна ускуустубатын инники кэскилин туһугар кыһамньытын иһин Ил Дархаҥҥа Айсен Сергеевичка ураты махтал! Ону тэҥэ муусука үөрэхтээһинин сайыннарар, үүнэр көлүөнэни духуобунай, сиэр-майгы иитиигэ утумнаахтык үлэлиир Үрдүкү муусука оскуолатын бары кэлэктиибигэр истиҥ махталбытын тиэрдэбит!
Сонун төрдө уонна хаартыска: Ил Түмэн пресс-сулууспата
-
0
-
0
-
0
-
0
-
0
-
0
