1945 сыл атырдьах ыйын 8 күнүгэр Сойуустаахтар эбэһээтэлистибэлэрин толорон, Сэбиэскэй Сойуус Дьоппуон импиэрийэтигэр сэриини биллэрбитэ. Атырдьах ыйын 9 күнүгэр сэбиэскэй сэриилэр кимэн киириини саҕалаабыттара.
Маньчжурскай стратегическай, Соҕуруу Сахалиннааҕы кимэн киирии уонна Курильскай десантнай операциялары ыытыы кэмигэр, А.М. Василевскай, Р.Я. Малиновскай уонна К.А. Мерецков хамандыырдаах Уһук Илиннээҕи Сэбиэскэй Сэбилэниилээх Күүстэр бөлөхтөрө Аан дойду иккис сэриитин сылларыгар Дьоппуон Императордарын сэбилэниилээх күүстэрин сүрүн сухопутнай сэриилэрин — Квантунскай аармыйаны үлтү сынньыбыттара. Бу кыайыы Дьоппуон хотторорун уонна Аан дойду иккис сэриитин бүтэрин түргэтэппитэ. Сэбиэскэй буойуттар хотугулуу-илин Кытайы (Маньчжурия), Кэриэй тумул арыытын, Куриль арыыларын уонна Соҕуруу Сахалины босхолообуттара.
Токийскай бириэмэнэн балаҕан ыйын 2 күнүгэр сарсыарда 9:02 чааска (Москва бириэмэтинэн 4:02 чааска) американскай «Миссури» линкор бортугар милитаристскай Японияны бигэргэммитэ суох капитуляциялыырын туһунан акт баттаммыта. Ону Дьоппуонтан тас дьыалалар миниистирдэрэ М. Сигэмицу уонна генерал Й. Умэдзу, сойуустаах командование өттүттэн оккупациялыыр сэриилэр холбоһуктаах бас хамаандалааччылара генерал Д. Макартур, АХШ-тан адмирал Ч. Нимиц, Кытайтан генерал Су Юнчан, Великобританиаттан адмирал Б. Фрейзер, ССРС-тан генерал К.Н. Деревянко, ону тэҥэ Австралия, Канада, Франция, Недерланд, Саҥа Зеландия бэрэстэбиитэллэрэ илии баттаабыттара. Дьоппуон Потсдам декларациятын усулуобуйаларын ылыммыта уонна «сойуустаах державаҕа бигэргэммитэ суох капитуляциялыырын» туһунан биллэрбитэ.
Киһи аймах устуоруйатыгар саамай улахан сэрии түмүктэммитэ.
Хаартыска: Галина Матвеева
-
0
-
0
-
0
-
0
-
0
-
0
