«Оттук сезонугар бэлэмнэниини толору кээмэйинэн түмүктүөххэ наада. Нэдиэлэ бүтүөр диэри өрөспүүбүлүкэ бары улуустарыгар сылаас кэлиэхтээх. Биһиги сүрүн сорукпут — эбийиэктэр тоһуттар тымныылар иннилэринэ бэлэм буолууларын хааччыйыы. Биһиги дьайыыларбыт хайдах ситимнээхтик барарыттан, төһө түргэтиириттэн дьон олоҕо, доруобуйата быһаччы тутулуктаах», — диэн Айсен Николаев тоһоҕолоон бэлиэтээтэ.
Өрөспүүбүлүкэ баһылыга ОДьКХ эбийиэктэрин, ТЭК (энергетика уонна хочуолунай хаһаайыстыбата) тэрилтэлэрин уонна социальнай эйгэни бэлэмнээһиҥҥэ үчүгэй көрдөрүүлэр баалларын бэлиэтээтэ. Өрөмүөн бырагыраамата 89% туолла, бу былырыыҥҥытааҕар 7%-нан үрдүк. Уопсайа 1 154 хочуолунайтан 1 001-рэ үлэҕэ толору бэлэм. Ититэр ситимнэр бэлэмнэрэ — 94%, уу ситимнэрэ уонна канализация — 91%. Уот ситимин саппааһырдар бары источниктар, ол иһигэр дизельнэй электростанциялар, толору бэлэм тураллар.
Мунньахха хотугу таһаҕаһы тиэйии чэрчитинэн уматык-энергетика өрөсүүрсэлэрин аҕалыыга ураты болҕомто уурулунна. Билиҥҥи туругунан былааннанар кээмэйтэн 67% (353 тыһ. туонна) тиэрдилиннэ. Хас биирдии нэһилиэнньэлээх пууну тохтоло суох ититиинэн хааччыйар туһугар, Саха Сирин баһылыга анал биэдэмистибэлэргэ логистиканы тус хонтуруолга ылалларыгар уонна уматыгы тиэрдиини бытаардыбыт улуустарга түргэтэтэллэригэр сорудахтаата.
Айсен Николаев ону таһынан олох-дьаһах инфраструктуратын эрэллээх оҥорорго сорудах биэрдэ. Эбийиэктэргэ тахсар түбэлтэлэр ахсааннара аҕыйаабытынан (1 209-тан 1 042-гэ диэри түспүт), эрэгийиэн салайааччыта эппиэттээх дьонтон систиэмэлэр үлэлэригэр ханнык баҕарар харгыстары таһаарбат туһугар уталыппакка дьаһаллары ылалларыгар модьуйда.
Маны таһынан, кыстык кэмигэр салаа үбүн-экэниэмикэтин туруктаах оҥорор туһугар, туһаныллыбыт олох-дьаһах өрөсүүрсэлэр иһин дебиторскай иэһи төлүүр үлэни күүһүрдэргэ сорудах бэрилиннэ.
-
0
-
0
-
0
-
0
-
0
-
0
