Инньэ гынан, сэтинньи 1 күнүттэн тырааныспар ситимин туруктаахтык тутар уонна таһаҕаһы тиэйиини быспат туһугар «ЛОРП» ПАУо «Жатай – Төхтүр» маршрутунан таһаҕас тиэйиитин анал флотунан саҕалаата. Туорааһын «Жатай-1» баржа, «ОТ-2050» соһор-үтэр теплоход уонна «Капитан Бородкин» ледокол өҥөтүнэн хааччыллар.
Баржаҕа уопсайа 95–100 легковой массыына эбэтэр 25-кэ диэри таһаҕас тиэйэр массыына киирэр кыахтаах. Бастакы рейс сэтинньи 1 күнүгэр күнүс 12 чааска диэри, устар аал туоларынан оҥоһулунна.
Сыананы олохтуур бирикээс алтынньы 9 күнүгэр бигэргэммит, ЛОРП саайтыгар баар. Өлүөнэ өрүс 1623-с килэмиэтиригэр (хаҥас кытыл) — Эһэ Арыыта маршрутунан ледокол арыалдьыттаах поруомунан туорааһын тарыыптара маннык быһаарылыннылар:
Легковой массыыналар:
4 м. диэри уһуннаахтар – 15 тыһ. солк.;
Ортолор: 4,01 м. – 5 м. диэри уһуннаахтар – 25 тыһ. солк.;
5,01 м. уһунтан уһуннар – 35 тыһ. солк.
Прицептар:
4 м. диэри уһуннаах – 30 тыһ. солк.;
4 м. уһун – 40 тыһ. солк.
Оптуобустар:
25 миэстэҕэ диэри пассажирдары ылар оптуобус – 45 тыһ. солк.;
25-тэн элбэх пассажирдаах – 60 тыһ. солк.
Грузовой массыыналар:
Алта миэтэрэҕэ диэри уһуннаах – 86 тыһ. солк.;
Алтаттан 10 миэтэрэҕэ диэри – 204 тыһ. солк.;
10-тан 15 миэтэрэҕэ диэри – 318 тыһ. солк.;
15 миэтэрэттэн уһун – 428 тыһ. 500 солк.;
Габариттара аһара барар, ыарахан уйуктаах тягачтар – 490 тыһ. солк.
Анал тиэхиньикэҕэ сыана эмиэ араас. Холобур, 20 туоннаҕа диэри кыамталаах кран – 190 тыһ. солк., оттон 40 туоннаҕа диэри уйуктаах бульдозер – 255 тыһ. солк.
Онон кыһыҥҥы суол турарын күүтэбит. Тырааныспарга министиэристибэ иһитиннэрэринэн, кыһыҥҥы суоллары оҥорууга күүскэ бэлэмнэнии бара турар. Суол хайысхатын бэлиэтииллэр, муус халыҥын күн аайы хонтуруоллууллар, кэлэр суоллары ыраастыыллар уонна тэҥнииллэр. Билигин подразделениелар үрдүк бэлэмнээх эрэсиимҥэ үлэлииллэр, тоҥоруу турдаҕына, кыһыҥҥы суолларынан айаны суһаллык саҕалыыр сорук турар.
Быйыл кыһыҥҥы суол ситимэ 11 900-тан тахса килэмиэти хабарын былаанныыллар. Ол курдук, «Аартыка суоллара» КП 8 156,12 килэмиэтир кыһыҥҥы суолу, ол иһигэр 1 124,02 килэмиэтир эргийэр суолу оҥоруохтаах. Ону тэҥэ, «Саха Өрөспүүбүлүкэтин автомассыына суолларын управлениета» ГКУ 3 791,92 килэмиэтир уһуннаах 13 массыына суолун бэлэмниир.
Сүрүн хайысхаларга бастакы түмүктэр бааллар:
Жатай – Төхтүр туорааһыҥҥа киирии суоллар өрүс икки өттүттэн оҥоһуллан бүтэн эрэллэр. Өлүөнэни туоруур кыһыҥҥы суолга («Умнас» а/д 12-с км — Хатассы — «Лена» а/д 1154-с км) Хатас сэлиэнньэтиттэн өрүскэ диэри суолу тэҥнээһин бүтэн эрэр.
Уос-Кумах арыыга туспа үлэ хайысхата тэриллибит: онно поруомунан суол тиэхиньикэтин (самосвал, грейдер, экскаватор, уу баһар массыына уонна МТЗ-82) тиэйэн илдьибиттэр. Алтынньы 13 күнүттэн биригээдэлэр кыһыҥҥы суолу оҥоруунан дьарыктаналлар.
Алтынньы 29 күнүгэр диэри 6 килэмиэтир уһуннаах учаастагы ыраастаан бүтэрдилэр. Суол туруохтаах сирин кутууну нэдиэлэ бүтүүтэ, тоҥоруу кытаанахтык турдаҕына саҕалыахтара.
Санатар буоллахха, кылгас кэмнээх кыһыҥҥы массыына суолларын, эрэгийиэннээҕи уонна муниципаллар ыккардыларынааҕы суоллары арыйар уонна сабар барыллаан график бигэргэнэн турар.
Галина МАТВЕЕВА
Ааптар хаартыскаҕа түһэриилэрэ
-
0
-
0
-
0
-
0
-
0
-
0
