– Роспотребнадзор сигнала суох ас-үөл хаачыстыбатын бэрэбиэркэлиир кыаҕа суох, ол иһин маннык сокуон олус наада уонна бастатан туран, олохтоох табаары оҥорооччулар интэриэстэрин көмүскүөхтээх, – диэтилэр дьокутааттар. Сокуон үбүнэн бигэргэниитэ суоҕун сыыһанан аахтылар, ас-үөл хас биирдии көрүҥүн стандартааһын, судаарыстыбаннай закупкаларга кыттыы, таможня куодун ылыы уо.д.а. үгүөрү үбү эрэйэрин бэлиэтээтилэр.
Ил Түмэн Төрүт олохтоох хотугу омуктар уонна Аартыка дьыалаларыгар сис кэмитиэтин бэрэссэдээтэлэ Елена Голомарева сокуон толору күүһүнэн үлэлиирин наадатыгар хас улуус ахсын лабораториялардаах бэтэринээрийэ салалталарын сөргүтэргэ эттэ, сарбыйыы содулугар билигин үгүс улуус бэтэринээринэй сулууспата филиал эрэ таһымынан олорорун санатта. Норуот дьокутааттара Владимир Богданов, Юрий Николаев, Виктор Федоров барылы ситэтэ суоҕунан аахтылар, эбии үөрэтэргэ эттилэр.
– Үтүө санааттан оҥоһуллубут сокуон, дьиҥинэн бу эйгэ федеральнай сокуонунан сүрүннэнэр. Ханнык баҕарар сокуон эппиэтинэһи үөскэтэргэ анаан ылыллар, ол эппиэтинэс кэһилиннэҕинэ – ыстарааптыыр сааҥсыйа түһэриллэр. Иккиһинэн, субъект сокуону чопчу дьаһаллары үбүлүүргэ анаан ылынар. Дакылааччыт бу сокуоҥҥа эбии харчы көрүллүбэтин, үбүлээһин тыа хаһаайыстыбатын тус сыаллаах бырагырааматын чэрчитинэн оҥоһулларын туһунан быһаарда. Атыннык эттэххэ, судаарыстыбаннай былаас уоргана, ол эбэтэр өрөспүүбүлүкэ бырабыыталыстыбата бу сокуону үбүлүүр боломуочуйата суох эбит. Оччотугар маннык сокуон наада дуо? Толкуйдуохха. Сокуон барылын өйүөҕү баҕарыллар эрээри, ситэрэн-хоторон, чахчы көдьүүстээхтик үлэлиирин, нэһилиэнньэҕэ туһалаах буоларын ситиһиэхпит дуо? – диэтэ парламент спикерэ Алексей Еремеев.
Куоластааһын түмүгүнэн, норуот дьокутааттара сокуон барылын бастакы ааҕыыга ылынарга итиэннэ бырабыыталыстыбаны кытары холбоһуктаах оробуочай бөлөҕү тэрийэн, үчүгэйдик чочуйан, ситэрэн-хоторон баран, иккис ааҕыыга киллэрэргэ быһаардылар.
- 0
- 0
- 0
- 0
- 0
- 0