Күрэхтэһиигэ 6-лыы киһилээх 7 хамаанда кытынна. Уопсайа 42 эдэр дьон хотуурдарын туппутунан быһыллыбыт сирдэринэн үүммүт хомуһу кырдырҕаччы оҕустулар. Балаһыанньа быһыытынан, хас биирдии хамаанда 0,2 гектаар иэннээх сири 2 чаас иһигэр охсон бүтэриэхтээх.
Тэрийээччилэр этэллэринэн, маннык күрэстэр устудьуоннары төрүт үгэстэргэ, илии үлэтигэр үөрэтэллэр. Эдэр дьон хотуурунан оту охсору сатыахтаахтар диэн бэлиэтээтилэр. Урукку сылларга үтүө үгэскэ кубулуйбут күрэхтэһии умнулла быһыытыйбытын эттилэр. Инникитин сөргүтүллэн, устудьуоннары түмэ тардарыгар баҕа санааларын тириэртилэр.
Күрэхтэһии арыллыытыгар алгыс тыла Сайсары күөлүн үрдүнэн сатарыйда, күрэхтэһээччилэри кымыһынан айах туттулар, уоннэ, дьэ, үлэ үгэнэ саҕаланна. Кыттааччылар кэпсииллэринэн, күөл хомуһа хас эмэ сыл охсуллубатах буолан, охсорго ыарахаттардаах. Сайыҥҥы күөх оту субуулуу сытыарартан быдан үлэлээх уонна сыралаах.
“Күһүҥҥү күүлэйгэ” ойуур комплексын уонна сири оҥоруу факультетын хамаандата муҥутуур кыайыылаах аатын ылла (159 кв.м.). Кинилэр бэриллибит сирдэрин түргэнник уонна хаачыстыбалаахтык охсон бүтэрдилэр. 2-с миэстэни ветеринарнай мэдиссиинэ факультетын хамаандата (141 кв.м.) ылла. 3-с миэстэҕэ инженернэй факультет бастакы хамаандата таҕыста (132 кв.м.).
Тэрээһин туһунан сиһилии хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
