Спорт

Саха сирин норуоттарын VIII спортивнай оонньуулара Саха Өрөспүүбүлүкэтэ тэриллибитэ 100 сылыгар – 2022 сылга от ыйын 4-9 күннэригэр Уус Алдан улууһугар ыытыллыахтара. Ол туһунан Саха Өрөспүүбүлүкэтин Ил Дархана Айсен Николаев Уус Алдаҥҥа кэлэ сылдьан, 2018 сыл от ыйын 27 күнүгэр тустаах дьаһалга илии баттаабыта. Сахабыт сиригэр улахан суолталаах, үбүлүөйдээх сылга норуоттар спортивнай оонньууларын ыытарга анал кэмитиэт тэриллэн, бэлэмнэнии үлэтэ бара турар.

Тэрийэр кэмитиэт бэрэссэдээтэлэ – Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччытын эбээһинэһин толорооччу Сергей Местников уонна Саха сирин парламенын бастакы вице-спикерэ Александр Жирков салайааччылаах бөлөх бастаан Суотту нэһилиэгэр 220 оҕо үөрэнэр оскуола тутуутун билистэ. Күн бүгүн оскуола көндөйө дьэндэйбит, кыһын устатыгар дьиэ тас өттүн оҥоруу түмүктэниэхтээх. Үлэ хаамыытын туһунан Саха Өрөспүүбүлүкэтин тутууга миниистирин солбуйааччыта Евгений Афанасьев, нэһилиэк баһылыга Василий Иванов иһитиннэрдилэр. Оскуола 2021 сыл ахсынньы ыйыгар үлэҕэ киириэхтээх.

Саха сирин норуоттарын VIII спортивнай оонньууларын тэрийэр кэмитиэт мунньаҕа Уус Алдан улууһун салалтатын дьиэтигэр буолла. Бу сырыыга тэрийэр кэмитиэт мунньаҕар анаан-минээн спортивнай тутуулары саҕалааһын уонна улууска 2022 сылга бэлэм буолуохтаах атын тутуулар тустарынан кэпсэтии, быһаарсыы буолла. Иһитиннэриилэри Уус Алдан улууһун баһылыга Алексей Федотов уонна өрөспүүбүлүкэ тутууга миниистирин солбуйааччыта Евгений Афанасьев оҥордулар. Ону тэҥэ мунньахха сибээс видео көрүҥүнэн сыһыаннаах министиэристибэлэр салайааччылара, эппиэттээх үлэһиттэрэ кыттыстылар.

Көтөҕүллүбүт боппуруостары дьүүллэһии кэмигэр Александр Николаевич тэрийэр кэмитиэт бэрэссэдээтэлэ Сергей Местников Уус Алдаҥҥа ыытыллыахтаах норуоттар оонньуулара уратылаах, суолталаах, хас биирдии спортсмен, ыалдьыт өйүгэр-санаатыгар умнуллубат өйдөбүнньүк буолан хаалыахтааҕын туһунан этиитин өйүүрүн иһитиннэрдэ уонна мунньах кыттыылаахтарын болҕомтотугар хас да этиилэри оҥордо. «Спортивнай оонньуулары тэрийиигэ бастакы сорук – күрэхтэһиилэр ыытыллыахтаах сүрүн тутууларын кэмигэр уонна үчүгэйдик тутан бэлэм гыныахтаахпыт. Биһиги 2022 сыллаах оонньууларга үс улахан тутууну былааҥҥа киллэртэрбиппит. Олору тутуу бүгүн саҕаланар. Үбэ-харчыта көрүлүннэ, ким тутара быһаарылынна, бүгүн акылааттарын түһэриэхпит. Ыйыллыбыт болдьоххо тутан бүтэриэх тустаахпыт.

Иккиһинэн, бу баараҕай тутуулар, атын да саҥа эбийиэктэр, суол-иис, уот ситимэ о. д. а. норуоттар оонньууларын кэнниттэн улууска хаалыахтара, өр сылларга улуус сайдыытыгар улахан тирэх, көмө буолуохтара. Онон 2022 сылга бу оонньуулары Уус Алдаҥҥа тэрийэр туһунан биһиги Ил Дархаммыт биир бастакы дьаһала биһиэхэ улууска улахан көмөлөөх, кэскиллээх буолуоҕа, ону биһиги толору туһаныах тустаахпыт», – диэн бэлиэтээтэ.

Үсүһүнэн, бастакы вице-спикер Саха сирин норуоттарын VIII спортивнай оонньууларын тэрийии сүрүн былааныгар киирбэтэх үгүс атын дьаһаллар баалларын туһунан эттэ. Норуоттар оонньуулара ыытыллалларын туһугар улуус, нэһилиэктэр таһымнарыгар үгүс үлэ тэриллиэҕэ. Онон ити боппуруостарга, чуолаан улуус киинигэр Бороҕоҥҥо, атын да нэһилиэктэргэ ыытыллыахтаах, өрөспүүбүлүкэ былааныгар суох үлэлэргэ тэрийэр кэмитиэт анаан-минээн мунньах тэрийэн дьүүллэһэрэ, быһаарыы ылынара, ити өттүнэн эмиэ улууска, нэһилиэктэргэ көмө буолара ирдэнэр диэн этии киллэрдэ.

Сүбэ мунньах кэнниттэн Сергей Местников, Алексей Федотов уонна Александр Жирков Мындаабаҕа тустуу саалатын, Бороҕоҥҥо Майаҕатта Бэрт Хара аатынан стадион уонна Н.Н. Тарскай аатынан хас да хайысханан үлэлиир спортивнай комплекс бастакы акылааттарын түһэрии үөрүүлээх тэрээһиннэригэр кыттыннылар.

Н.Н. Тарскай аатынан спорт дыбарыаһын акылаатын түһэриигэ мустубут дьоҥҥо туһаайан Александр Жирков: «Бүгүн биһиги чугас эргин өтөр-наар буолбатах түгэҥҥэ муһуннубут. Ол курдук, Мүрү нэһилиэгэр Саха сирин норуоттарын VIII  спортивнай оонньууларыгар аналлаах үс баараҕай спортивнай тутуулар этиллибит болдьохторугар тутуулара саҕаланна, үһүөннэрин акылаата тэҥҥэ түстэ. Маннык, өрөспүүбүлүкэ таһымнаах хас даҕаны баараҕай тутууну биир нэһилиэккэ тэҥинэн саҕалааһын – бэлиэ түгэн. Үһүөн холбоон миллиардтан тахса суумалаах тутуулар. Балартан Спорт дыбарыаһа ураты, анал бырайыагынан тутуллуоҕа. Биһиги барыбыт сорукпут – норуоттар VIII оонньууларыгар тутууларбытын кэмигэр уонна үчүгэй хаачыстыбалаахтык тутан бүтэриэхтээхпит. Иккиһинэн, күрэстэһээччилэри уонна кэлэр ыалдьыттары бука барыларын дьоһуннаахтык көрсүөхтээхпит-атаарыахтаахпыт. Уонна үсүһүнэн, бу оонньууларга Уус Алданнар биһиги көхтөөхтүк кыттыахтаахпыт, кыайыылаах түмүктэрдээх буолуох тустаахпыт. Барыгытын ис сүрэхпиттэн эҕэрдэлиибин. Мөккүөрдэр сүнньүнэн биһиги туһабытыгар түмүктэннилэр, бу баараҕай тутуулар акылааттара түстэ, норуоттар VIII оонньууларыгар бэлэмнэнии сүрүн түһүмэҕэ саҕаланна. Инникитин даҕаны биһиги туспутугар барыта анаабыт курдук табыллан истин», – диэн Александр Жирков үөрүүлээх тэрээһиҥҥэ мустубут дьону-сэргэни эҕэрдэлээтэ, алгыс барҕа тылларын эттэ.

Бу тэрээһиннэр кэннилэриттэн Ил Түмэн бастакы вице-спикерэ Александр Жирков, Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы эбээһинэһин толорооччу Сергей Местников, улуус аҕа баһылыга Алексей Федотов салгыы Мүрү нэһилиэгин 2 №-дээх орто оскуолатын саҥа дьиэтин тутууну дьүүллэстилэр, «Кэскил» оҕо саадын уонна В.В Никифоров – Күлүмнүүр аатынан култуура киинин тутуу хаамыытын, тэтимин билистилэр. Бу икки улахан тутуу эмиэ, чуолаан «Кэскил» оҕо саадын үбүлээһинэ, тохтотулла сылдьыбыта, ол эрэн улуус, салалта туруорсуутунан этэҥҥэ быһаарылынна, аны тутуу тохтуо суоҕа диэн Александр Николаевич эттэ.

Иван Никитин