Билигин кэтэх хаһаайыстыбалаах ыаллар, идэһэлэрин туттаннар, олохтоох тыа хаһаайыстыбатын исписэлииһэ Дмитрий Колмогоров уонна бэтэринээр Мичил Павлов, хороҕор муостааҕы тутар хаһаайыстыбалары кэрийэ сылдьан, быйыл төрөөбүт ньирэйдэргэ чип туруоран бэлиэтээтилэр, ону кытта испиэһэк оҥорон, чуолкай сүөһү ахсаанын ааҕан бүтэрэн эрэллэр.
Быйыл сайын күн-дьыл туран биэрэн, былааннаммыт оту оттоон, үчүгэйкээн күөх рулоннар, кыбыылары толору дьаарыстанан туралларын көрөн, хас биирдии киһи хараҕа үөрэр буолуохтаах. Кыстыгы көрсө Сииттэбит нэһилиэгэр икки ынах хотоҥҥо киирээт, алтынньы ыйга утуусубуу төрөөтүлэр.
Хаһыс да сылын нэһилиэкпитигэр олохтоох дьаһалта көҕүлээһининэн ыччаттарбыт, соҕотох олорор олохтоохторбутугар, быстах эпэрээссийэҕэ сылдьар биир дойдулаахтарбыт дьиэ кэргэттэригэр муус ылыытын субботнига бу тухары ыытыллан кэллэ. Бу да сырыыга кыаммат соҕотох дьоммутун мээнэ хаалларбатыбыт, кыахпытынан болҕомто уурдубут. Ол курдук, тэрилтэннэн, аймахтарынан, чугас ыалларынан шефтэһэн муус ылан, уолаттар тиэйэн биэрдилэр. Тустаах уолаттарбытыгар үтүө көмөлөрүн иһин махтал бастыҥын анаатылар.
Хас биирдии саха ыалын остуолугар маанылаах көмүс хатырыктаахпыт, собобут барахсан күндү ас буоларын бары да билэбит. Сыл аайы буоларын курдук, Сииттэбит нэһилиэгэр муҥха саҕаланан, бар дьоммут күөх боллох оҕонньор бэрсибит минньигэс соботун амсайан үөрүүбүт улахан.
Ити курдук, Сииттэ үлэһит, хоһуун дьонноро үлэни — хамнаһы өрө тутан, нэһилиэкпит сайдарын туһугар бука бары биир санааннан үлэлии — хамсыы, айа — тута олоробут.
Марианна Сивцева суруйуута
Хаартыскалар Дабаан хаһыат, Улусмедиа саайтан
-
0
-
0
-
0
-
0
-
0
-
0
