Сынньалаҥ киинин сэбиэдиссэйэ Е.Н.Гоголева бырайыагынан, Хоноҕор нэһилиэгэр өр сылга үтүө суобастаахтык үлэлээбит 3 ийэ аата саҥа аллеяҕа үйэтитилиннэ. Ону тэҥэ, бу үтүө бырайыагы "Илгэ" фольклорнай ансаамбыл өйөөбүтүн бэлиэтиир оруннаах.
Аллеяны арыйыы үөрүүлээх түгэнигэр ытык ийэлэр ааттарыттан кинилэр оҕолоро, сиэннэрэ кыһыл аалай лиэнтэни кырыйбыттара бэрт долгутуулаах буолла. Ол курдук үлэ,тыыл бэтэрээнэ,Саха Өрөспүүбүлүкэтин култууратын туйгуна,Ийэ албан аата 1-2 истиэпэннээх мэтээллэр кавалердара,Саха Өрөспүүбүлүкэтин иккис Бэрэсидьиэнэ Вячеслав Анатольевич Штыров Ийэҕэ Махтал үрдүк сыанабылынан бэлиэтэммит "Илгэ"фольклорнай ансаамбылы төрүттээччилэриттэн биирдэстэрэ, ырыаһыт,тойуксут, оһуохайдьыт Вера Афанасьевна Абрамова төрөппүт оҕолорун ааттарыттан СӨ социальнай көмүскэл туйгуна Фекла Михайловна Кычкина; СӨ култууратын туйгуна,СӨ уонна Уус- Алдан улууһун култууратын сайдыытыгар кылаатын иһин бэлиэлэр хаһаайыннара,"Илгэ"ансаамбылга салайааччынан, өр сылларга "Түһүлгэ" СК үтүө суобастаахтык үлэлээбит,Суотту нэһилиэгин Бочуоттаах олохтооҕо Лидия Васильевна Пермякова уонна кини бииргэ төрөөбүт балтыларын, оҕолорун ааттарыттан СӨ доруобуйа харыстабылын туйгуна Мотрена Васильевна Пермякова; Дьоруой ийэ Барашкова Пелагея Никифоровна аатыттан кини төрөппүт кыыһа үлэ,сыана бэрээнэ,СССР эргиэнин туйгуна,үлэ- олох кирбиитин сыанабылын хаһаайката," Илгэ"ансаамбыл солиската, Суотту нэһилиэгин Бочуоттаах олохтооҕо Анна Ивановна уонна дьиэ кэргэн аҕа баһылыга,үлэ бэтэрээнэ Иван Иванович Заровняевтар уонна "Илгэ" ансаамбыл салайааччытын СӨ доруобуйатын харыстабылын туйгунун Альбина Михайловна Максимова Дьиэ кэргэн аллеятын аалай лиэнтэтин быстылар.
Үйэлээх бырайыак аһыллыытын нэһилиэк киэн туттар фольклорнай ансаамбыла,ырыа - хоһоон аргыстаах "Илгэ" киэргэттэ.
Кэнэҕэһин бу аллея -искибиэргэ салгыы ийэлэр, эбэлэр, эдьиийдэр, балтылар ааттарынан көмүс суруктаах ыскаамыйалар туруоруллуохтара. Бу үтүөкэн бачыымы Суотту нэһилиэгин баһылыга В.И.Иванов өйөөтө. Үөрүүлээх тэрээһиҥҥэ кэлбит дьоҥҥо анаан"Өбүгэм ситимэ" быыстапка, сэргэх кэнсиэр көрдөрүлүннэ, оһуохай дьиэрэйдэ.
Ити күн Ийэ аатыгар сүгүрүйэн, "Түһүлгэ" сынньалаҥ киинин үлэһиттэригэр көмөлөһөн Уус - Алданнааҕы техникум устудьуоннара эриэккэс ырыаларын ыллаан көрөөччү кутун туттулар. Ону сэргэ "Кустук" оҕону сайыннарар киин бэтэрээннэрин "Ситим" үҥкүү бөлөҕө (сал. Е.Гоголева), "Сарыада" үҥкүү бөлөҕө (сал. М.Никитина) уонна техникум кыргыттара "Дэйбиирдээх үҥкүүнэн" сахалыы тыыннаах кэрэ үҥкүүлэри бэлэх ууннулар. Ымыылаах ырыаһыппыт Лена Заровняева, кэргэннии дуэт Татьяна, Филипп Габышевтар, Ирина Осипова уйан ырыаларынан дуоһуттулар."Тэбэнэттэр" көр - күлүү бөҕөтө көрдөөх сыаҥкаларынан көрөөччүлэри сэргэхситтилэр.
Бу күн кэлбит ийэлэр тэрээһиҥҥэ кыттан, сынньанан, дьүөгэлэрин кытта алтыһан, үөрэ-көтө тарҕастылар. Тэрээһини ыыппыт "Түһүлгэ" СК үлэһиттэригэр барҕа махталбытын биллэрэбит, үлэлэригэр үрдүк ситиһиилэри баҕарабыт.
Бээрийэ кыыһа Хотойук Айгыына,
общкорр, суруналыыс, суруйааччы.
Хаартыскалар ааптар тиксэриитэ
-
4
-
0
-
0
-
0
-
0
-
0
