«Мэҥкэр» дьиэ кэргэн бааһынай хаһаайыстыбата быйылгы сыл устатыгар 620 киилэ мүөтү ылла. Ол мүөт атыыга хамаҕатык барар. Григорьевтар салааны салгыы сайыннарар сыалтан, тиэргэннэригэр ыҥырыа икки кыстыыр дьиэтин тутан үлэҕэ киллэрдилэр. Оттон индейкаларын этэ бэлиэр атыыланан бүттэ. Билигин куурусса уонна хонуу куруппааскытын сымыыта атыыга таҕыстар эрэ, тута батарыллар.
Ыал ийэтэ Саргылаана Афанасьевна кэргэнигэр, Тимофей Дмитриевичка, көмө-тирэх буоларын таһынан, Дьокуускайдааҕы «Үрүҥ аанньаллар» хампаанньа генеральнай дириэктэринэн, өрөспүүбүлүкэ судаарыстыбаннайа суох социальнай өҥөнү оҥорор уонна социальнай урбаанньыттар ассоциацияларын бэрэссэдээтэлин солбуйааччынан үлэлиир. Үлэҕэ көхтөөх, иллээх ыал былырыын «Арассыыйа 100 бастыҥ ыалын» кэккэтигэр киирэннэр, Бүтүн Арассыыйатааҕы Атыы-эргиэн промышленнай палата бэрэсидьиэнин тус болҕомтотугар киирэн, сыл устата Дьиэ кэргэн сэбиэтэ ыытар араас таһымнаах үөрэхтэригэр, тэрээһиннэригэр ыҥырыллан сырыттылар.
Ааспыт ыйга Башкортостан киинигэр, Уфа куоракка, ыытыллыбыт форумҥа Саргылаана Афанасьевна уола Эдуардыын бара сылдьан, Атыы-эргиэн промышленнай палататын вице-бэрэсидьиэнэ Елена Дыбоваҕа Амма мүөтүн кэһии гынан туттарбыта.
-- Уфаҕа ыытыллыбыт форумҥа Саха сиринээҕи Атыы-эргиэн промышленнай палататын, бэйэбит үлэбитин-хамнаспытын, атын биир идэлээхтэрбит ситиһиилэрин туһунан билиһиннэриибин олус сэҥээрэн истибиттэрэ, -- диэн кэпсиир Саргылаана Афанасьевна. – Үгүс киһи Саха сиригэр кэлэ сылдьыахтарын баҕаралларын биллэрбиттэрэ. Түмүккэ бэйэбит ииппит ыҥырыаларбыт мүөтүн сахалыы тыыннаах, харысхалаах хааҕа уган вице- бэрэсидьэммитигэр Елена Николаевнаҕа «Башкирия мүөтүттэн уратыта суох, амсайыҥ» диэн этэн туран туттарбытым. Аны аҕыйах хонуктааҕыта Москватааҕы Атыы-эргиэн промышленнай палататтан төлөпүөнүнэн эрийэннэр, мүөппүтүн суһаллык ыытарбытыгар, ол Арассыыйа Бэрэсидьиэнэ Владимир Путиҥҥа уонна Бырабыыталыстыбаҕа кэһии быһыытынан ахсынньы 30 күнүгэр туттарыллыахтааҕын туһунан эттилэр. Онон 250 грамнаах 40 иһити ыыттыбыт, Сахабыт сирин, Аммабыт мүөтэ үрдүк сыанабылы ылла диэн үөрүүбүт улахан.
Амматтан Алтаана Артемьева
-
0
-
0
-
0
-
0
-
0
-
0
