Стадиоҥҥа дьон тобус-толору, +30С буһарык куйааска лыык курдук ыга симсэн, аны чаас аҥаарыттын ордук Ыһыах аһыллыытын үөрүүлээх сиэрин-туомун кэтэстибит. Күммүт оруобуна оройбутугар тыгар, туох да дурда-хахха суох буолан, итии баанньыкка буһа-хата олорор курдук көлөһүммүт иннибитинэн-кэннибитинэн сүүрдэ. Аны кэтэстэххэ, бириэмэ, эчи бытаанын.
Иннибитигэр икки кыра оҕолоох ыал олороллор, оҕолор барахсаттар итиинэн хаарыйар күн сытыы сардаҥатыттан хаххалана сатаан, ип-итиигэ кууркаларын бүрүннүлэр. Олоро сатаан баран 6-7 саастаах кыыстара тулуйбата, иннин-кэннин диэки эргичиҥниир, дьону көрүтэлиир. Онтон күнтэн-ардахтан хаххалыыр бүрүөһүннээх үрдүк сололоох тойоттор-хотуттар олорор киин трибуналарын диэки ыйда: «Ийээ, биһиэхэ тоҕо итинник хахха суоҕуй?», — диэн ыйытта.
Ийэтэ чочумча соҕус ах баран хаалла, онтон: «Һыллый, итиннэ Ил Дархан, куорат баһылыга олороллор», — диэн быһаарда. Кыысчаан ымсыырбыттыы күнтэн хаххалыыр бүрүөһүннээх трибуна диэки одуулуу көрдө уонна боростуой дьону онно киллэрбэттэрин ырылхайдык өйдөөтө. Оҕолор буһарык итиигэ утатан, сотору-сотору ийэлэриттэн уу көрдүүллэр. Ыһыах аһыллыытын сиэрэ-туома бүтүөр диэри тулуйан олорботулар: «Ийээ-аҕаа, барыахха, манна итии баҕайы», — диэн дьоннорун үүйэ-хаайа туттулар. Төрөппүттэрэ тулуйа сатаан баран, хайыахтарай, икки оҕолорун сиэппитинэн тахсан бардылар.
Эдэр ыччаты, үүнэр көлүөнэни төрүт култуурабыт үгэстэригэр сыһыара сатыыбыт даҕаны, саатар ыһыахтыыр стадиоҥҥа күнтэн хаххалыыр бүрүөһүн тутарга үп-харчы көстүбэтэ дьикти. Уонна социальнай ситимнэргэ тойотторбут ыһыахха мөлүйүөнүнэн суумаҕа банкеттаатылар диэн тарҕаталлар.
Кыра оҕолоох эрэ дьон буолбакка, дабылыанньалаах киһи, сааһырбыт дьон +30С итиигэ күнүс күн оройугар хас да чаас аһаҕас стадиоҥҥа олорон, ыһыах аһыллыытын көрөрө күчүмэҕэй. Үс Хатыҥҥа «Суһал көмө» массыыната быыстала суох сүүрдэ. Онон дьоҥҥо табыгастаах, күнтэн хаххалаах усулуобуйаны тэрийэр уолдьаста.
- 5
- 0
- 0
- 0
- 0
- 0