Сыһыыларга сыбыытыыр сыспай сиэллээх көмүрүө хаары көмүллээн, халыҥ хаары анныттан амтаннаах аһын хаһан булан астына-астына кимиритэ- хомурута, илдьиритэ ыстаан тотуо- ханыа. Ласпаччы буолбут биэ хотун сотору кэминэн үөрү үксэтиэ, кэккэни хаҥатыа. Хотоҥҥо кыстаабыт хороҕор муостаах хонон турдах аайы хонууга хотолдьуйа хаамар кэмэ чугаһыырын бүтэйдии сэрэйэн эрдэҕэ, эрдэлээн төрөөбүт ынах үрүҥ илгэни үрүлүтэн мааныланан от киэнэ сыалааҕынан, эбии аһылык амтаннааҕынан хатаҕаланна.
Сааскы кэм барахсан сандаарыйан, сырдаан, күнүҥ уотунан көбө соҕус күндүлээн баардылаппаккын барыан баҕарбат кыстык кыһарҕанын, ыарырҕаппаккын быыһык кэм бытарханын! Сааскы кэм барахсан умуннараҕын уһун кыһын улуктуйуутун, сэргэхситэ- сэгэлдьитэ сэргэстэһиннэрэ кэрэхсэтэ кэккэлэтэн бэлэхтиигин сырдыгынан, сылааһынан сыдьаайар күннээх күннэри!
Халлааны кэтээн көрөөччүлэр сабаҕалыылларынан, кэлэр нэдиэлэ ортотугар Дьокуускайга -6С диэри сылыйыа.
Хаартыска Мария Васильева, СИА.
-
0
-
0
-
0
-
0
-
0
-
0
