Муҥхаҕа муҥхаалласпакка, омуннурбакка, оттомноох, дьоһун дьоммутун инники уктан оҕо дьону кыттыһыннарыах,эрчимнээх эдэр дьоннуун кэккэлэһиэх. Ойбоннору алларан, наардаан- сааһылаан нырыыһыттары ыытан улаҕа диэкиттэн улам-улам оргууй наллаан иилии тутан төгүрүтэ эргийэн ийэтигэр тиийэн оргуйар уулуу өрө мөхсөр көмүс хатырыктааҕы өрөһөлүү таһааран уоскута- налыта тэлгэтэн Аар айылҕаҕа махтана, Күөх Боллоххо сүгүрүйэ хамыйаҕынан ааҕан, куулунан сүгэн илии тутуурдаах буолуоҕуҥ.
Идэһэбит бүтэй сыалаах бүөрдэннин, куҥ этиттэн түөс этэ да хаалсыбат халыҥ буоллун.Үөрбүччэ- көппүччэ бүдүргэй сыалаах ыргыччы миини астына-астына иһиэҕиҥ, сыыйа-баайа субай хааны кутуоҕуҥ, Күөх от туһалаах күүһүн иҥэриммит иһин- үөһүн ырытан сааскы салбаҥ күннэргэ хаһааныаҕыҥ. Дьэҥкир күөх муус уутун төгүрүк сыл иһэрдии дьаһаныаҕыҥ. Түбүгүрбүппүт түмүгэ туһалаах буоллун, түмсүбүппүт үтүөтэ үгүс буоллун.
Хаартыска эрэдээксийэ архыыбыттан.
-
0
-
0
-
0
-
0
-
0
-
0
