Демянскайдааҕы кимэн киирии кэмигэр Ильмень күөлү туорааһын иһин кыырыктаах кыргыһыыга кыттыбыт 12-с гвардейскай стрелковай куорпус 3-с, 19-с уонна 40-с хайыһар туспа биригээдэлэрин састаабыгар сэриилэспит саха буойуннарын хорсун быһыыларын 79-с сылын бэлиэтээһин чэрчитинэн, бу дьаһалы Арассыыйа Бэрэсидьиэнигэр Саха Өрөспүүбүлүкэтин Бэрэстэбиитэлистибэтэ олохтоох былаас уорганнарын кытары тэрийэн ыытта.
Дэлэгээссийэ Устьрека дэриэбинэҕэ баар бырааттыы көмүллүбүттэр уҥуохтарыгар саха буойуттарыгар анаммыт өйдөбүнньүккэ уонна «Улуу Новгород – Старай Русса» тыраассаҕа турар «Старай Руссаны босхолоспут саха буойуттарыгар» өйдөбүнньүк бэлиэҕэ венок уурда. Ону таһынан Ретлё диэн дэриэбинэҕэ Ильмень күөл кытылыгар Ньурба улууһун уопсастыбанньыктара 2020 сыллаахха туруорбут сэргэлэригэр сырытта.
Устьрека дэриэбинэҕэ бырааттыы көмүллүбүттэр уҥуохтарыгар саха буойуттарыгар анаммыт өйдөбүнньүккэ тэриллибит миитиҥҥэ олохтоох былаас уорганын бэрэстэбиитэллэрэ, бэтэрээннэр, устудьуоннар, уопсастыбаннай түмсүүлэр актыыбыстара уонна Наговскай поселение олохтоохторо кыттыыны ыллылар. Саха сирин норуоттарын музыкаларын уонна уус-уран айымньыларын мусуойун иһинэн тэриллибит «Чэгиэн» ансаамбыл артыыстара 1941-1945 сс. сэрии саҕанааҕы сахалыы ырыалары ыллаатылар, хомуһунан композиция толордулар.
Саха Өрөспүүбүлүкэтин Бэрэстэбиитэлистибэтин салайааччыны солбуйааччы Юрий Кравцов саха буойуттарын сырдык кэриэстэрин үйэтитиигэ үтүө суобастаахтык үлэлиир Новгород олохтоохторугар наҕараадалары туттартаата: Тас сибээс уонна норуоттар дьыалаларыгар министиэристибэ «Норуоттар доҕордоһуулара» өйдөбүнньүк бэлиэтин – Наговскай сельскэй поселение дьаһалтатын баһылыгар Виктор Бучацкайга, Бэрэстэбиитэлистибэ Бочуотунай Грамотатын – «Борисово» балыксыттар артыалларын бэрэссэдээтэлигэр Михаил Рюхиҥҥа, Бэрэстэбиитэлистибэ Махтал суругун – Наговскай сельскэй поселение дьаһалтатын исписэлииһигэр Валентина Пятинаҕа.
– Биһиги Аҕа дойдуну көмүскүүр Улуу сэрии сылларыгар Старай Руссаны босхолуур иһин кыргыһыыга сырдык олохторун толук уурбут саха буойуттарын көмүс уҥуохтара көтөҕүллүбүт ытык сиригэр турабыт. Биһиги иллээхтик-эйэлээхтик олорорбут туһугар кинилэр бу сири босхолообуттара. Эһиэхэ, күндү ыалдьыттарбытыгар, саха дьонугар, бокулуон буолуохтун, сыллата кэлэн биир дойдулаахтаргытын кэриэстииргит иһин, – диэтэ Старай Русса оройуонун бэтэрээннэрин сэбиэтин бэрэссэдээтэлэ Юрий Будылев.
Миитин Аҕа дойдуну көмүскүүр Улуу сэриигэ өлбүттэр кэриэстэригэр биир мүнүүтэҕэ саҥата суох нөрүйэн туруунан итиэннэ үс төгүллээх саанан ытыынан түмүктэннэ диэн Бэрэстэбиитэлистибэ пресс-киинэ иһитиннэрэр.
-
0
-
0
-
0
-
0
-
0
-
0
