Бэлиэ күн

От күѳх Мас Дракон кыыл символлаах 2024 сыл үгүс дьоҥҥо кѳhүтүллүбэтэх уларыйыылары аҕалыаҕа. Дракон тѳhѳ да суостаах-суодаллаах кыыл буолан кѳhүннэр, кинини табыллыы уонна ѳрѳ тахсыы арыаллыыллар. Ол да иhин Дракон бэлиэлээх сыл саамай табыллыбыт сылгыт буолуон сѳп.

Үүнэр 2024 сыл — баҕа санаа олоххо киирэр кэмэ. Оннооҕор хаhан да туолуо суох курдук баҕа санаа туолуоҕа. Бэйэтин күүhүгэр эрэнэр уонна сыалын чуолкай билэр киhи ону хайаан да ситиhиэҕэ. Дьаныар уонна муударас дьүѳрэлэстэҕинэ, сѳҕүмэр ситиhии кэлиэҕэ. Чаҕыйан, толлон, чугуруйан эрэ биэриэ суохха наада.

Эҕэрдэлиибит!

Кытай халандаарынан Дракон сылларынан 1952, 1964, 1976, 1988, 2000, 2012, 2024 сыллар буолаллар. Бу сылларга тѳрѳѳбүттэр ханнык баҕарар эйгэҕэ ситиhиигэ дьулуhар чаҕылхай уонна уhулуччу дьон.

СѲ Судаарыстыбаннай Мунньаҕын (Ил Түмэн) VII ыҥырыытын дьокутааттарын ортолоругар Дракон сылыгар тѳрѳѳбүт дьоммут ону эмиэ туоhулууллар. Түгэнинэн туhанан, Сергей Ларионовы, Павел Петрову (1964 с.), Дмитрий Поисеевы, Александр Кошукову (1976 с.) уонна Дмитрий Панькову (1988 с.) Саҥа дьылынан, үүнэр 2024 сылынан истиҥник эҕэрдэлиибит уонна Дракон символлаах бэйэлэрин сылларыгар кинилэргэ кытаанах доруобуйаны, ситиhиилэри, табыллыыны уонна айымньылаах үлэни баҕарабыт!

Илиҥҥи гороскоп Дракон сылыгар тугу ыралыыр?

Кырыыса

Тѳрѳѳбүт сыл: 1948, 1960, 1972, 1984, 1996, 2008, 2020

Кырыысалар саҥа 2024 сыл устатыгар мэлдьи суол хайдыhыытыгар туруохтара. Олохторун уларытыахтарын баҕардахтарына, саҥа саҕахтары карьера эйгэтигэр арыйыахтара. Дохуоттара улаатыаҕа, баай-талым олохтонуохтара. Ол эрэн Кырыысалар онон сѳп буолан хаалан хаалыахтара дуу, иннилэрин диэки салгыы айанныахтара дуу, ол бэйэлэриттэн тутулуктаах.

Үлэҕэ-хамнаска ситиhии кэлбитин да иhин, Кырыысалар доруобуйаны уонна иккис аҥардарын кытта сыhыаны инники күѳҥҥэ тутуохтара.

Оҕус

Тѳрѳѳбүт сыл: 1949, 1961, 1973, 1985, 1997, 2009, 2021

Мас Дракон сыла Оҕустарга элбэх эйгэҕэ сайдыыны мэктиэлиир. Карьераттан саҕалаан, тапталга тиийэ. Үлэҕэ-хамнаска улахан кыахтар арыллыахтара. Сүрүнэ, холку, быhаарыылаах уонна эппиэтинэстээх буолуохха наада.

Тус олохторо Оҕус бэлиэлээхтэргэ эмиэ туспа үѳрүүлэри аҕалыаҕа. Карьераны уонна дьиэ кэргэни тэҥнии туттахха, олус табыллыаҕа. Тугу эмит хобби оҥостон, үлүhүйэн туран дьарыктаннахтарына, түмүгэ эмиэ бэрт үчүгэй буолуо.

Тигр

Тѳрѳѳбүт сыл: 1950, 1962, 1974, 1986, 1998, 2010, 2022

Тигрдарга элбэх хамсааhыннаах, кэлиилээх-барыылаах сыл үүнүѳҕэ. Этэргэ дылы, ѳрѳ кѳтүү да, таҥнары түhүү да баар буолуохтара. Ол иhин аhара үѳhээ ыттарга дьулуспаттара ордук. Таҥараҕа сэрэҕи таптыыр диэн мээнэ этиллибит тыллар буолбатахтар эбээт. Ол курдук, кэскиллээх быhаарыыны ылынарга ыксаан, сыыhаны-халтыны таhаарбаттара ордук.

Тус олоххо бэйэ-бэйэни ѳйдѳспѳт буолууттан ыарахаттар үѳскүѳхтэрин сѳп. Тигрдар дьону кытта алтыhарга үѳрэниэхтэрин наада, ол элбэх кыhалҕаттан мүлчү кѳтѳргѳ кѳмѳлѳhүѳҕэ. Сыл бүтэhигэр барыта этэҥҥэ буолуоҕа, бигэ туруктаах олох кэлиэҕэ.

Хоруолук (Куоска)

Тѳрѳѳбүт сыл: 1951, 1963, 1975, 1987, 1999, 2011, 2023

Хоруолуктары Дракон сылыгар үтүѳ уларыйыылар, дьикти түгэннэр күүтэллэр. Кинилэр бары ѳттүнэн толкуйдаммыт быhаарыыны ылыннахтарына, табыллар ѳттүгэр эрэ барыахтара. Хоруолуктар саҥа сылга сыалларын ситиhэллэригэр мэhэйдиир туох эрэ кѳhүтүллүбэтэх түгэҥҥэ эмиэ бэлэм буолуохтара. Онтон туhалаах түмүгү оҥостуохтара. Чахчыта да, Дракон уларыйымтыа-тэлэрийимтиэ сылыгар ыксыыр-ыгылыйар наадата да суох.

Дракон

Тѳрѳѳбүт сыл: 1952, 1964, 1976, 1988, 2000, 2012

2024 сыл символыгар Дракоҥҥа бу сыл кыайыыны-хотууну эрэ тосхойуо суоҕа. Ситиhиилээх буолар туhугар элбэхтик үлэлиэххэ-хамсыахха, сүүрүѳххэ-кѳтүѳххэ наада. Бэйэҕэ аhара эрэнэри, ордук хос ыраланары умнуллуохтаах. Драконнар кыра-улахан диэн араарбакка, күннээҕи кыра да соҕус ситиhиилэриттэн үѳрэ, астына сырыттахтарына, улахан суолталаах ситиhиилэр кэлиэхтэрэ.

Тус олохторугар барыта үчүгэй. Чугас дьоннорун санааларын таптахтарына, сыhыаннарын тупсаран биэрдэхтэринэ, бэйэлэригэр үчүгэй эрэ дьайыылаах буолуоҕа.

Моҕой

Тѳрѳѳбүт сыл: 1953, 1965, 1977, 1989, 2001, 2013

Моҕойдор Дракон сылыгар туруоруммут сыалларын-соруктарын ситиhэллэригэр тулуурдаах буолаллара ирдэнэр. Үтүѳ түмүк тута кэлэригэр эрэнэр сатаммат.

Тус олохторугар барыта үчүгэй. Соҕотох Моҕойдор күүтүүлээх аҥардарын, ураты күндү киhилэрин кѳрсүѳхтэрэ. Арай уларыйыылартан куттаныа суохтарын наада. Оттон уларыйыылар Дракон сылыгар син биир тахсыахтара. Моҕойдор саҥаҕа аhаҕас буоллахтарына, иннилэрин диэки туохтан да иҥнибэккэ дьулуруйуохтара.

Ат

Тѳрѳѳбүт сыл: 1954, 1966, 1978, 1990, 2002, 2014

2024 сылга бу бэлиэ бэрэстэбиитэллэригэр табыллыы кэлэрэ бэйэлэриттэн эрэ тутулуктаах буолуоҕа. Улахан сыалы ситиhэргэ арыый кыра суолталааҕы киэр илгэн кэбистэхтэринэ, үчүгэй событиелар бэйэлэрин кэтэhиннэриэхтэрэ суоҕа. Туолар кыаҕа суох диэн сылдьар баҕа санаалара кытта туолан соhутуон сѳп.

Дракон сылыгар туох сыыhа дии санаабыттарыттан Аттар тэйиччи тутталлара наада. Ону кытта доруобуйаларын кѳрүнэллэригэр бириэмэ дьэ кѳстүѳҕэ. Оттон тус олохторугар таптал, ил-эйэ бигэтик олохсуйуоҕа.

Бараан (Коза)

Тѳрѳѳбүт сыл: 1955, 1967, 1979, 1991, 2003, 2015

Бараан сылыгар тѳрѳѳбүттэргэ Дракон сыла үтүѳ хаачыстыбаларын кѳрдѳрѳллѳрүгэр бэрт табыгастаах кэм. Бииргэ үлэлиир уонна чугас дьонноро кинилэргэ айар дьоҕурдарын, амарах сыhыаннарын иhин олус махталлаах буолуохтара.

Барааннары элбэх интэриэhинэй, үчүгэй событиелар күүтэллэр. Ол эрэн ыарахаттар да баар буолуохтара. Маннык түгэннэргэ дьулуур, дьаныар кѳмѳлѳhүѳхтэрэ.

Тус олохторугар саҥа кэскиллээх кѳрсүhүүлэр күүтэллэр. Саамай сүрүнэ, 2024 сылга олоххо бэйэ сыалын умнуо суохха наада.

Эбисийээнэ

Тѳрѳѳбүт сыл: 1956, 1968, 1980, 1992, 2004, 2016

Мас Дракон сылыгар Эбисийээнэлэр булугас ѳйдѳрүнэн ханнык баҕарар уустук түгэнтэн кыайыылаах тахсыахтара. Үтүѳҕэ эрэллэрин хаhан да сүтэрбэт буолан, ыарахан, кыаллыбат ѳттүн оонньууга-күлүүгэ кубулутуохтара, чэпчэкитик ылыныахтара.

Эбисийээнэлэр туруоруммут сыалларыттан туораабатахтарына, кырата суох ситиhиилэниэхтэрэ. Тус олохторугар аhаҕас, элэккэй майгылара сылаас сыhыан мэктиэтэ буолуоҕа.

Бѳтүүк

Тѳрѳѳбүт сыл: 1957, 1969, 1981, 1993, 2005, 2017

Бѳтүүктэргэ Дракон сыла табыллыбыт сылларынан буолуоҕа. Ол ордук карьераҕа биллиэҕэ. Чаҕылхай карьера таhынан, олох саҥа эйгэҕэ тиксэн хаалыахтарын сѳп.

Ити эрээри Бѳтүүктэр ким ханна алҕас туттубутугар болҕомтолорун аhара уурбакка, хамаандаҕа үлэлииргэ үѳрэнэллэрэ, тэрийэр дьоҕурдарын туhаналлара эрэйиллэр. Тус олохторо бэйэ-бэйэни кытта кѳмѳлѳсүhүүгэ уонна ѳйдѳhүүгэ олоҕуруохтара.

Ыт

Тѳрѳѳбүт сыл: 1958, 1970, 1982, 1994, 2006, 2018

Ыт бэлиэлээхтэр олохторо 2024 сылга эриэ-дэхси, нус-хас буолуоҕа. Ол эрэн онтон дуоhуйан олорон хаалар уонна дьыаланы умнар сатаммат.

Үлэҕэ-хамнаска саҥа үрдэллэр күүтэллэр. Ситиhии кэлэригэр кэллиэгэлэри кытта биир сыаллаах үлэ тирэхтээх буолуоҕа.

Дракон сылыгар Ыттар чиэhинэйдэрэ, сымнаҕас майгылара табыллыыга тиэрдиэҕэ. Тус олоххо итэҕэйсии, таптал баhылыаҕа.

Сибиинньэ (Кабан)

Тѳрѳѳбүт сыл: 1959, 1971, 1983, 1995, 2007, 2019

Саҥа сыл бу бэлиэҕэ кыаҕырыы кэмэ тосхойуоҕа. Кэллиэгэлэрэ Сибиинньэлэр тус уопуттарын уонна талааннарын үрдүктүк сыаналыахтара. Онон бу бэлиэ бэрэстэбиитэллэрэ киэҥ билиниини ылан, далбарга сылдьыахтара.

Дракон сылыгар Сибиинньэлэр айар дьоҕурдара күүскэ сайдыаҕа уонна уларыйа турар усулуобуйаларга сѳп түбэhэллэригэр кѳмѳлѳhүѳҕэ. Сүрүнэ, улахан ситиhии кэлэригэр эрэниэххэ наада.

***

            2024 сыл хас биирдии Зодиак бэлиэтигэр ити курдук тус-туhунан, ураты түгэннэр буолуохтара. Ол да үрдүнэн кыайыгас-хотугас, күүстээх-уохтаах Дракон барыбытыгар, бастатан туран, табыллыыны уонна баҕа санаа туолуутун аҕалыаҕа.