Аан дойду төрүт олохтоох омуктарын аан дойдутааҕы күннэригэр аналлаах «Нэл. Хэлми. Ниңиэмун. Түһүлүк» өрөспүүбүлүкэтээҕи быыстапка иитинэн атырдьах ыйын 5-9 күннэригэр “Симэх” норуот уус-уран оҥоһуктарын киинэ уонна СӨ хотугу аҕыйах ахсааннаах норуоттар маастардарын сойууһа маастар-кылаастары ыытар диэн «Эдьигээн сонуннара» хаһыат кылаабынай эрэдээктэрэ Мария Аполлонова суруйар.
Бу тэрээһиннэргэ Эдьигээн оройуонун Кыстатыам нэһилиэгиттэн төрүттээх, билигин Дьокуускай куоракка олорор биир дойдулаахпыт, СӨ норуот уус-уран оҥоһуктарын маастара Евдокия Охлопкова кыттыыны ыла сылдьар.
-Мин таба иитиитинэн дьарыктанар дьиэ кэргэҥҥэ күн сирин көрбүт буоламмын, оҕо эрдэхпиттэн эбэҥки норуотун төрүт дьарыгар уһуйуллан улааппытым. Иискэ-ууска сыһыарбыт киһим ийэм буолар, онон төрүт үгэһинэн иистэниини илдьэ сылдьабын, араас быыстапкаларга ситиһиилээхтик кыттан эбэҥки норуотун култууратын киэҥ эйгэҕэ тарҕатабын. Бу күннэргэ тэрийээччилэр ыҥырыыларын быһа гыммакка баҕалаах, интэриэстээх дьоҥҥо бэйэм маастарыстыбабын көрдөрөбүн. Ол курдук, балык тириитин таҥастааһыны, таба иҥиириттэн сабы оҥорууну, сарыыттан уонна таба муоһуттан харысхаллары оҥорон таһаарарга үөрэтэ сылдьабын. Бу күннэргэ олус үчүгэй тэрээһиннэр буола тураллар, ол курдук талааннаах маастардар бэйэлэрин сатабылларын көрдөрөллөр, маастарыстыбаларын үллэстэллэр. Маннык дьаһалларга сылдьан киһи элбэххэ үөрэнэр, сайдар, бэйэтигэр саҥаны, сонуну арыйар, — диэн кэпсээтэ Евдокия Тимофеевна.
Улусмедиа
-
1
-
0
-
0
-
0
-
0
-
0
