Дьокуускайдааҕы 13 №-дээх орто оскуоланы уонна Докучаевскайдааҕы 3 №-дээх орто оскуоланы кытары доҕордоһуу теле мост ыытылынна. Бу тэрээһиҥҥэ үөрэх тэрилтэлэрэ бииргэ үлэлээһиннэрэ туһалааҕын уонна оҕолорго сөптөөх усулуобуйаны тэрийиигэ, гуманитарнай сибээһи бөҕөргөтүүгэ элбэх өрүттээх үлэни ыыталларын бэлиэтээтилэр .
13 №-дээх орто оскуола дириэктэрэ Иосиф Слепцов Докучаевскай үөрэнэччилэрин кытта билсиһии улахан суолталааҕын ыйда. Эрдэ кинилэр видеонан дьаһалтаны кытта бииргэ үлэлэһии туһунан кэпсэппиттэр. Инникитин оскуолалар педагогическай уопуттарын көхтөөхтүк атастаһар уонна үөрэнээччилэргэ анал экскурсиялары тэрийиэхтэрэ. Бу барыта уопсайынан үөрэх хаамыытын тупсарыаҕа уонна оҕолор билиилэрин хаҥатыаҕа диэн сыаналыыллар.
Докучаевскай 3 №-дээх орто оскуолатын дириэктэрэ Татьяна Кравченко, бииргэ үлэлээһин үөрэнээччилэргэ саҥа кыахтары арыйарын тоһоҕолоото. «Биһиги доҕордоһуубут – аҥаардас формальность эрэ буолбатах, уопсай сыаллары ситиһэргэ – үөрэхтээх, талааннаах уонна араас өттүнэн сайдыылаах оҕолору иитиигэ кыаҕы биэрэр. Биһиги хас биирдии оҕо өйөбүлү билэрин, бэйэтин кыаҕын арыйарын уонна саҥа чыпчааллары дабайарын хааччыйар эйгэни тэрийэргэ дьулуһабыт», — диэн эттэ.
Тэрээһин кэмигэр оҕолор бэйэ-бэйэлэрин эҕэрдэлэстилэр уонна айар талааннар көрдөрдүлэр, салгыы сибээстэһиигэ эрэллэрин биллэрдилэр. «Маннык тэрээһиннэр улахан суолталаахтар уонна биһигини түмэллэр, уопсай сыаллары уонна гуманитарнай сибээстэр суолталарын туһунан толкуйдуурга көмөлөһөллөр. Бу чуолаан Донецкай Норуодунай Өрөспүүбүлүкэ, Луганскай Норуодунай Өрөспүүбүлүкэ, Запорожье уонна Херсон уобаластарын Арассыыйаҕа холбоспут күннэрин иннинэ олус суолталаах. Биһиги доҕордоһууну бөҕөргөтөргө бары күүспүтүн ууруохтаахпыт», — диэн «Россия – моя история» түмэл дириэктэрэ Дмитрий Соловьев эбэн эттэ.
Дьокуускайдааҕы 13 №-дээх орто оскуола уонна Докучаевскайдааҕы 3 №-дээх орто оскуола икки ардыларыгар сөбүлэҥ түһэрсиллибитэ үүнэр көлүөнэ сайдыытыгар сүҥкэн оруоллаах.
-
1
-
0
-
0
-
0
-
0
-
0
