Ити күн Маарыйа кыыс аан дойдуну уонна киһи аймаҕы куһаҕантан араҥаччылыыр аналлаах Иисуһу төрөтөр. Уол төрөөбүтэ 12 хонугар сибэтиэй Иордан өрүскэ киллэрэн сүрэхтииллэр. Ол кэмтэн саҕалаан сыл ааҕыллан барар. Ити аата, билигин Иисус сиргэ кэлбитэ 2021 сылын туолла. Оччолортон саҕалаан таҥара дьиэтэ туспа көҥүлү ылан, Рим импиэрийэтин салайбытынан барар. XVII үйэ суруйааччыта Никифор Каллист таҥара дьиэтин устуоруйатын суруйарыгар “Алтыс үйэҕэ Юстиниан импэрээтэр Киристиэс Ороһуоспатын аан дойду бырааһынньыга оҥорбута” диэн бэлиэтиир.
Ороһуоспа – православнай таҥара дьиэтин аан дойдуга саамай киэҥник тарҕаммыт улуу бырааһынньыга. Ороһуоспаттан ыла итэҕэллээхтэр 40 хонук устата эти сиэбэттэр, үүтү испэттэр. Наар үүнээйи аһылыктаналлар. Ол аата үрдүк айыы тойон иннигэр туох баар кирдэрин-хохторун ыраастыыллар, өйдөрүн-санааларын сайҕыыллар. Православие Арассыыйаҕа олорор норуоттарга үтүө уонна хара санаа өйдөбүллэрин, сиэр-майгы үгүс бириинсиптэрин иҥэрбитэ, онон Арассыыйаҕа олорор норуоттары барыларын түмпүтэ. Саха сирин устуоруйатыгар православие хотугу кыраай норуоттарыгар Арассыыйа улуу култууратын билиһиннэрбитэ, үөрэҕи, сырдыгы сахпыта. Төрүт култуура сайдарыгар кыаҕы, бараммат баайы иҥэрбитэ.
Тохсунньу 7 күнэ үүнэр түүн күөл, өрүс уута сибэтиэй ууга кубулуйарга бэлэмнэнэр. Уу аннынааҕы иччилэр онтон куттанан, ууларытттан ойбонунан ойон тахсаллар. Ороһуоспа түүн, таҥара үөрэҕэ этэринэн, «Үрдүк халлааҥҥа — таҥараҕа айхал, сиргэ — эйэ-ил, дьоҥҥо таҥара үтүө сыһыана тосхойор”. Көннөрү киһи өйө хаһан да ситиэ суох курдук. Ол гынан баран, итэҕэйэр сүрэх ити кистэлэҥнэри арыйыыга ордук чугаһыыр үһү.
-
0
-
0
-
0
-
0
-
0
-
0
