Нэһилиэк түөлбэтин аайыттан, саастарынан араарыллан, бастакы бөлөххө 20-39, иккис бөлөххө 40-60 саастаахтар кытыннылар.
Олус интэриэһинэй күрэх алта түһүмэхтээх. Ийэлэр бары да эппиэтинэстээхтик сыһыаннаһан, истиҥ-иһирэх биэчэри бэлэхтээтилэр.
Бу күрэххэ нэһилиэкпит эр дьоно актыыбынай кыттыыны ылбыта кэрэхсэбиллээх. Көрө-ыалдьа кэлбит бары кэрэ аҥаардарга биир дойдулаахпыт, урбаанньыт Арьян Русланович Мохначевскай тыыннаах тюльпан туттаран үөртэ. "Эр бэртэрэ" бассаап-бөлөх уоланнара, араас сирдэргэ олорор биир дойдулаахтарбыт, күрэххэ кыттыбыт ийэлэргэ сибэкки дьөрбөтүн бэлэх ууннулар!
Биэчэри ыытыыга, дьүүллүүр сүбэҕэ, муусукаалынай эҕэрдэлэргэ нэһилиэк эр дьоно, ыччата кыттан, дьоро киэһэни толору ситэрдилэр.
Биир соһуччу үөрүүлээх түгэнинэн киириигэ босхо лотерея билиэтин биэрэн, бириис сүүйэн, бааттаахтар дьиэлэригэр илии тутуурдаах тарҕаспыттара буолар.
Түмүккэ кыайыылаахтары быһааран, маннык ааттары иҥэрдилэр:
“Бэйэни билиһиннэрии” түһүмэххэ "Хомоҕой Куо-2022" - Татьяна Стручкова.
“Дьиэ-кэргэн ураты дьарыга” түһүмэххэ "Сиэдэрэй Симэх-2022"- Яна Васильева.
“Төрөөбүт төрүт аспытынан күндүлүүбүт” түһүмэххэ "Сандалы Куо-2022" - Нарыйа Докторова.
Дьоҕур түһүмэҕэр "Талба талаан-2022" - Дария Андросова.
Көрөөччүлэр биһирэбиллэрин "Сайдам Куо-2022" - Дария Андросова.
Киэһээҥҥи мааны былаачыйаны көрдөрүүгэ "Талба Куо-2022" - Нарыйа Докторова.
Бары түһүмэхтэри ситиһиилээхтик ааһан, кыайыылаах "Күн Күбэй Ийэ-2022" аатын Татьяна Стручкова ылла.
40-60 саастаахтарга көрөөччүлэр биһирэбиллэрин "Сайдам Хотун-2022" уонна "Далбар Хотун-2022" ааттары Мария Кычкина тэҥинэн сүктэ.
Бу күрэххэ ыал аҕалара, кэргэннэрин өйөөн, оҕолорунаан кыттыбыттара истиҥник көстүү буолла. Барытыгар көхтөөхтөрө көһүннэ.
Быйылгы сыл Балыктаахха Ыччат сылынан биллэриллибитэ. Онон сыл устата былааннара киэҥ, өссө элбэх ситиһиилэри кэтэһэбит.
Мария Захарова,
Балыктаах, Мэҥэ Хаҥалас.
-
0
-
0
-
0
-
0
-
0
-
0
