Чааһынай дьиэҕэ гааһы холботорго көмө төлөбүр 2010 сылтан көрүллэр. Ити сыл өрөспүүбүлүкэ Бырабыыталыстыбата нэһилиэнньэни гаастааһыҥҥа анаммыт саҥа ыйааҕы таһаарбыта. Ол эрээри, урукку сылларга манна улахана суох үп көрүллэрэ. Быйыл хайа да сыллааҕар элбэх үп гааска холбонор дьоҥҥо төлөнөр буолла. Уопсай суумата -- 22 мөл. солк. Билиҥҥи туругунан, сыл бүтүөр диэри өссө 100-150 ыал көмөнөн туһанар кыахтаах.
Онуоха сүрүн ирдэбил маннык. Гааһы чааһынай дьиэҕэ холботор ыал орто дохуота биир киһиэхэ ыйдааҕы тииһинэн олоруу алын кээмэйиттэн 1,5 төгүл элбиэ суохтаах (30 899 солкуобайтан). Былырыын эбэтэр быйыл гаас хочуолунайын, гаас плиткатын, счетчигы, тутуу матырыйаалларын атыылаһан хааччыммыт буоллаҕына, ороскуотун 100-150 тыһ. солк. диэри төлөттөрөр бырааптаах.
2021 сыл ахсынньы 31 күнүгэр диэри гаас киллэттэрэргэ ороскуотурбут дьон саамай элбээбитэ 100 тыһ. солк. көмө быһыытынан ылаллар. Онтон 2022 сыл тохсунньу 1 күнүттэн гаас киллэттэрбит ыал 150 тыһ. ылар кыахтаах. Аҕа Улуу сэриитин кыттыылааҕа, огдообото, инбэлиитэ, тыыл бэтэрээнэ ыйдааҕы дохуоттарыттан тутулуга суох көмөнөн бары туһаналлар.
-
0
-
0
-
0
-
0
-
0
-
0
