Амма улууһун баһылыгын социальнай боппуруостарга солбуйааччыта Николай Ларионов салайааччылаах социальнай десант ааспыт нэдиэлэттэн саҕалаан улуус бары нэһилиэктэрин хабан нэһилиэнньэни кытта көрсөр, тус бэсиэдэлэри, консультациялары оҥорор.
Бэҕэһээ десант улахан бөлөҕө Сатаҕай, Эмис, Алтан нэһилиэктэригэр үлэлээтэ. Сатаҕайга нэһилиэнньэ кэлэ сатаабыт эбит буоллаҕына, Алтаҥҥа уонна Эмискэ уопсай көрсүһүү буолбата. Ол да буоллар, биирдиилээн дьон кэлэн консультациялары ыллылар. Сатаҕайга эпиэкэ салаатын салайааччыта Саргылана Хван, ИДьО сокуоннай саастарын ситэ илик оҕолор инспектора, полиция майора Лилия Никифорова, уйулҕа сулууспатын исписэлиистэрэ Саргылана Андреева, Оксана Гаврильева сылдьаннар, барыта 60 оҕону хабан көрсүһүү, бэсиэдэ оҥордулар.
Нэһилиэнньэни кытта көрсүһүүгэ биир бастыҥ үлэлээх бэтэрээннэр Сэбиэттэрин бэрэссэдээтэлэ Анна Андрееваҕа «Кыайыы 80 сыла» үбүлүөйдээх мэтээл туттарылынна. Манна даҕатан эттэххэ улуус бэтэрээннэрин Сэбиэтин бэрэссэдээтэлэ Мария Захарова десаны кытта сылдьыһан бэтэрээннэри кытта көрсүһэн, иһитиннэриилэри оҥорор. Бу да сырыыга Мария Романовна эмиэ хас да тус көрсүһүүнү оҥордо.
Алтаҥҥа дьон-сэргэ ордук интэриэһиргээн МФЦ «Мин докумуоннарым» исписэлииһэ Ирина Федорованы, дьарыктаах буолуу киин исписэлииһэ Раиса Софронованы кытта көрсүһэн консультацияластылар, докумуон да туттардылар. Социальнай бэлиитикэ уонна ыччат дьыалатын управлениетын граннары кытта үлэҕэ исписэлииһэ Сахая Никонова хайдах Граннарга, бырайыактарга үлэлиэххэ сөбүгэр эмиэ туһалаах сүбэлэри биэрдэ, кэлэн анаан-минээн үлэлииригэ сүбэлэстилэр.
Эмис нэһилиэгэр элбэх киһи кэлэн МФЦ -тан бэлэм буолбут докумуоннарын ыллылар, социальнай көмүскэл биир кэлим киинин салайааччытын солбуйааччы Евдокия Александрованы кытта элбэх киһи кэлэн көрүстэ, наадыйар боппуруостарын быһаарыста. Маны сэргэ «Аҕа дойду көмүскээччилэрэ» судаарыстыбаннай фонда социальнай координатора Дария Павлованы, уйулҕа исписэлиистэрэ хас нэһилиэк аайы анал байыаннай дьайыы бэтэрээннэрин дьиэлэригэр сылдьан дьиэ кэргэттэрин кытта кэпсэттилэр. Десант салайааччыта Николай Ларионов Сатаҕайга оскуолаҕа сырытта, өрөмүөннэммит мастарыскыайы көрдө. Десант кыттыылаахтара бу сырыыга Эмискэ сылгыһыттарга анаан ыытылла турар семинар практикумҥа манна кыттыыны ыла сылдьар атынан айанньыт, Өймөкөөн улууҺун бочуоттаах олохтооҕо Дугуйдан Винокуровы кытта көрүстүлэр.
«Маннык кэлэн бараллара туох да наһаа үчүгэй буоллаҕа дии. Биһиги мантан мээнэ улуус киинигэр киирбэппит, киирдэххэ даҕаны салайааччыга тута киирбэккин. Барыта кэтэһиилээх. Онон барытыгар ыксалынан сылдьаҕын. Мин бу кэлэн биэрбиттэригэр хата бэйэм наадыйар боппуруоспун быһаарыстым»,- диэн Сатаҕай нэһилиэгин олохтооҕо Варвара Елисеева санаатын үллэстэр.
Бүгүн десант Амма Наахара, Болугур, Покровка нэһилиэктэригэр сырыытынан үлэтин түмүктүүр.
«Амма олоҕо» хаһыат
-
0
-
0
-
0
-
0
-
0
-
0
