Ол курдук, Амма, Горнай, Мэҥэ Хаҥалас уонна Нам улуустарын лестничестволарыгар барыта холбоон 59 221 гектар иэннээх тыа эмтэниэҕэ. Солконү өрөөччү ордук ууһаабыт сирдэригэр «Клонрин КЭ» диэн инсектициди бөртөлүөтүнэн ыстарыахтара. Бу препарат 0,09 грамма биир гектарга сөп буолар, онон үс лиитэрэлээх суурадаһыны оҥорон биир гектар иэннээх ойуурга ыстарыллар. Дьоҥҥо уонна сүөһүгэ куттала суох. Ол эрээри, ыстарыллар учаастактарыгар атырдьах ыйын 10 күнүттэн саҕалаан балаҕан ыйын 3 күнүгэр диэри ойуурга сылдьар, сир аһын, отону, тэллэйи хомуйар бобуллар. Чуолаан ханнык учаастарга эмп ыстарылларын туһунан тустаах лестничестволартан билэргэ сүбэлииллэр.
Учуонайдар этэллэринэн, солко өрөөччү (Сибиир шелкопряда) хантан да кэлбэт, манна мэлдьи баар, лыах көрүҥэ буолар. Ахсаана аҕыйаҕынан, киһи хараҕар мээнэ көстүбэт, хоромньуну таһаарбат. Ол эрээри, кэмиттэн кэмигэр, чуолаан курааҥҥа олус элбээн, коконтан гусеницаҕа кубулуйар кэмигэр тиит мас мутукчатын кэрбээн бүтэрэр кутталлаах. Ордук күн үчүгэйдик көрөр, салгын охсор тыаларыгар, ойуур саҕатыгар үөскүүр. Саха сиригэр 1905-1907, 1921-1925, 1948-1952, 1969, 1999-2003 сыллардаахха, кэлин 2010 сыллаахха Чурапчыга, Тааттаҕа, Аммаҕа үөдүйэ сылдьыбыта, уонна былырыыҥҥыттан биллэр. Ол иһин, ордук уутуйан үөскээбит сирдэригэр ыраастааһын-эмтээһин ыытыллара былааннанна.
- 0
- 0
- 0
- 0
- 0
- 0