“Якутскэнерго” ПАУо генеральнай дириэктэрэ Алексей Стручков иһитиннэрбитинэн, аныгы оҥоһуулаах эбийиэк Дьокуускай кытыытынааҕы хас да нэһилиэнньэлээх пууну хаачыстыбалаах уотунан-күөһүнэн хааччыйар кыахтаах.
– Тутуу үлэҕэ киирдэҕинэ, уот кыамтатын күүһэ 32 тыһ. кВА диэри улаатыаҕа. Дьокуускай түөлбэлэрин эрэ буолбакка, Жатай уонна Тулагы-Киллэм нэһилиэктэрин эмиэ хааччыйар буолуоҕа, – диэн Алексей Стручков этэр.
“Хатыҥ Үрэх”, “Радиоцентр” уот-күөс кииннэрин ноҕоруускатын чэпчэтэн үс дьоҕус ыстаансыйа эрэллээхтик үлэлиирин ситиһиэҕэ. Маны таһынан чааһынай дьиэ олохтоохторуттан, социальнай тутуулартан, урбаанньыттартан эбии сайаапкалары ылар кыах үөскүөҕэ.
“Марха” дьоҕус ыстаансыйа сыһыарыллыбыт оройуонугар хаарбах туруктаах дьиэттэн көһөрүү бырагырааматынан тутуллубут эбийиэктэри эмиэ хаачыстыбалаах уотунан хааччыйыан сөп. Үрдүк кыамталаах уот ситимин (линиятын) тардыахтара, билигин үлэ тигинэччи бара турар. Бу уот ситимин тардан бүтэрэн үлэҕэ киллэрдэхтэринэ, “ЯГРЭС Новая-Кангалассы”, “ЯГРЭС Новая-Радиоцентр”, “Радиоцентр-Марха”, “Хатыҥ-Үрэх-Марха” эргэ мас баҕаналарын көтүрүөхтэрэ.
-
0
-
0
-
0
-
0
-
0
-
0
