Уопсастыба

Агробырамыысыланнай комплекс үлэһиттэрин, тыа хаһаайыстыбатын табаарын оҥороччуларын түмэр, кинилэр үлэҕэ ситиһиилэрин көрдөрөр-сырдатар, хардарыта уопут атастаһар сыаллаах Бүтүн Арассыыйатааҕы «Көмүс күһүн» быыстапка тыа хаһаайыстыбатын уонна астыыр-таҥастыыр бырамыысыланнас үлэһиттэрин күнүн чэрчитинэн сыл ахсын баччаларга ыытыллар.

Быйыл 24-с төгүлүн ыытыллар быыстапка сыллата кыттааччытын ахсаана элбээн, хабар эйгэтэ кэҥээн, таһыма үрдээн иһэр. Арассыыйа бары эрэгийиэннэрин бэрэстэбиитэллэрэ оҥорон таһаарбыт бородууксуйаларын аҕалаллар. Тустаах собуоттар тыа хаһаайыстыбатын саҥа тиэхиньикэлэрин, учуонайдар саҥа технологиялары, научнай арыйыылары билиһиннэрэлэр.

Быйылгы быыстапкаҕа дойду 30 эрэгийиэнин бэрэстэбиитэллэрэ кэлбиттэр. Дьыалабыай бырагыраама чэрчитинэн, АПК-ны судаарыстыба өттүттэн өйөөһүн, тыа сирин территорияларын сайыннарыы, сыыппара технологиятынан сэбилэнии, каадырынан хааччыллыы, агротуризм, о.д.а. хайысхаларынан «төгүрүк остуоллар», кэпсэтиилэр ыытыллаллар.

Дойду аграрийдарын бу улахан дьаһалларыгар Саха Өрөспүүбүлүкэтиттэн Бырабыыталыстыба Бэрэссэдээтэлин солбуйааччы Михаил Никифоров салайааччылаах дэлэгээссийэ кыттар. Дэлэгээссийэ састаабыгар тыа хаһаайыстыбатын миниистирэ Александр Атласов, миниистири солбуйааччы Артем Александров, «Сахаагроплем» ГБТ салайааччыта Алексей Жирков, «Саха сүөһүтэ» хааһына тэрилтэтин дириэктэрэ Александр Артемьев, Тыа хаһаайыстыбатын министиэристибэтин сүөһүнү иитиигэ, племенной кэтээн көрүүгэ, кэпэрээссийэҕэ уонна хаһаайыннааһын дьоҕус киэптэригэр департаменын салайааччыны солбуйааччы Галина Осипова уо.д.а. бааллар.

– Быыстапка бастакы күнүгэр АПК-ы сайыннарыыга анаммыт хас даҕаны «төгүрүк остуолга» кытынныбыт. Саха Өрөспүүбүлүкэтин Бастайааннай Бэрэстэбиитэлистибэтигэр «Төрүт сүөһү генопуондата» ассоциация салайааччыта Харон Амерханов салайыытынан, «Төрүт боруода сүөһүлэри харыстааһын уонна сайыннарыы – Арассыыйа ас-үөл өттүнэн тутулуга суох буолуутн тирэҕэ» диэн тиэмэҕэ Бүтүн Арассыйатааҕы научнай-практическай кэмпириэнсийэ ыытылынна.

Сүрүн дакылааттары Арассыыйа Федерациятын Тыатын хаһаайыстыбатын министиэристибэтин Сүөһүнү иитиигэ уонна племенной дьыалаҕа департаменын дириэктэрин солбуйааччы Галина Сафина, эрэгийиэннэр бэрэстэбиитэллэрэ, учуонайдар оҥордулар. Биһиги өрөспүүбүлүкэбититтэн Бырабыыталыстыба Бэрэссэдээтэлин солбуйааччы Михаил Никифоров саха боруода сүөһүнү-сылгыны уонна табаны иитии тустарынан улахан дакылааты оҥордо. Оттон бэҕэһээ ыытыллыбыт пленарнай сиэссийэҕэ Арассыыйаҕа ас-үөл өттүнэн куттал суох буолуугар улахан кэпсэтии тэрилиннэ, – диэн кэпсээтэ  миниистир Александр Атласов.

Алтынньы 6 күнүгэр саха дэлэгээссийэтэ «Дьоҕус агробизнес: саҥа кыахтар, интеграция проблемалара, бэйэ дьарыктаахтар ис кыахтара» диэн «төгүрүк остуолга», итиэннэ Тыа хаһаайыстыбатын миниистирэ Дмитрий Патрушев кыттыыны ылбыт СБЕР «Бигэ солкуобай» бранчыгар үлэлээтилэр. «Үрдүк хаачыстыбалаах аһылык бородууксуйатын оҥоруу» куонкурус түмүк тэрээһинигэр сырыттылар итиэннэ Москуба уобалаһыгар баар көтөрү иитэр «Элинар» хампаанньа үлэтин-хамнаһын билистилэр, уопут атастастылар.

Бүгүн өрөспүүбүлүкэ Тыатын хаһаайыстыбатын министиэристибэтэ уонна Нам улууһун дьаһалтата Брянскай уобаластааҕы «Агротехсервис» хампаанньаны кытары бииргэ үлэлээһин дуогабарын түһэрсиэхтэрэ. Бу дуогабар быһыытынан, Нам улууһугар кэлэр икки сылга, 2023-2024 сылларга, тыа хаһаайыстыбатын сирин эргиирин олоххо киллэрии чэрчитинэн, быраҕыллыбыт сирдэри таҥастаан, бааһына иэнин кэҥэтии үлэтэ-хамнаһа тэриллиэҕэ.

Алтынньы 8 күнүгэр «Көмүс күһүн» быыстапка сабыллыыта, салаларынан кыайыылаахтары чиэстээһин ыытыллыаҕа.