Ол эрээри, сымнаҕас кыhын буолла диэн түмүк оҥорор эрдэ буолуо, өссө да саамай тымныы икки ыйбыт иннибитигэр кэтэhэн тураллар. Кулун тутар саҕаланыыта даҕаны тымныы -50 кыраадыска чугаhыыр дьыллара баар буолааччы. Билиҥҥитэ циклон, салгын Иркутскай уонна Красноярскай кыраайтан кэлэ турар, ол иhин киин уонна илин эҥэр улуустарга улахан тымныылар биллэ сырыттылар. Дьыл оройун диэкиттэн салгын хамнааhына хоту, илин өттүттэн буоллаҕына, кэлэр ыйдар тоhуттар тымныыларын биллэрэн барыахтара, ол оннугар илин эҥэр сылыйан биэриэ. Ити гынан баран, уhун унньуктаах тымныы туруо суоҕа, эмискэ тымныйыа, эмискэ сылыйыа, ордук Кириhиэнньэ эргин тымныйан ылыа, саҥа сылбыт бастакы ыйын саҕаланыыта сымнаhыар буолуо, онтон саҥа тахсыбыт эттик ыйбыт туолан төннүүтүгэр тымныйан барыа.
Быйыл кыhын хаар халыҥ буолар чинчилээх, хаар кытаанах, быыл курдук бытархай хаар элбэх ууну аҕалара саарбаҕа суох, эбии күhүҥҥү ардахтар сайынын уунан бычалыйбыт сири-дойдуну толорон биэрбиттэрэ. Ону таhынан күhүн иккитэ төхтүрүйэн хаарын уулларбыта, алтынньы 24 күнүгэр сайыҥҥылыы дохсун ардах түhэн аны саас элбэх уу тахсыаҕын айылҕабыт барахсан түстээбитэ. Хайдахтаах да сааскы тыал халлааннаан көтүппэт уута сытарын бэйэҕит даҕаны билэн олордоххут, сааскы халаантан сэрэниэххэ эрэ наада. Кылгастык сабаҕалааhыным итинник. Салгыы кыhыҥҥы күннэр хайдах буолуохтарын ханнык билгэлэртэн көрүөххэ сөбүгэр аҕыйах холобуру аҕалабын:
1. Кыhын халыҥ хаардаах буоларыгар балаҕан ыйыттан эрдэ хаардаан барар уонна алтынньыга хаар кыырпаҕа бөдөҥ буолар.
2. Тымныы түhүөн аҕыйах күн иннинэ Чолбон сулус чаҕылыччы улаатан көстөр буолар, сылаас кэлэригэр – өлбөөдүйэн көстөр.
3. Кыhыҥҥы күн чаҕылыйан көстөрө уонна кытаран киирэрэ сотору сылыйыаҕын түстүүр.
4. Кыhын дьүкээбил уота оонньоотоҕуна аҕыйах күнүнэн сис былыт кэлэр -- бу олох көтүппэт билгэ буолар.
5. Киhи тыына үрдэххэ көҕөрөн көстөр буоллаҕына, тымныы -45 кыраадыс эргин буолбут диэн, оттон үрдэххэ тыаhа сыыгыныыр буоллаҕына, -50 кыраадыс буолбут диэн сабаҕалыахха сөп.
6. Түптэлэс тымныы туран оhох турбатын буруота бөлөх-бөлөх устан көhүннэҕинэ, сотору тымныы уостар.
7. Кыhын хаар түhэ туран бөдөҥ кыырпаҕынан түhэн тохтоотоҕуна, сотору кэминэн эмиэ хаар кэлэригэр.
Алексей ВАСИЛЬЕВ-Өксөй, Бүлүү, Халбаакы
-
2
-
0
-
1
-
0
-
0
-
0
