Саха тустуутун төрүттээччи Николай Николаевич Тарскай туhунан кылгастык кэпсиир буоллахха, 1954 сыллаахха Саха сиригэр Москубатааҕы Иосиф Сталин аатынан Киин физкультурнай үнүстүүтү саҥа бүтэрбит түөрт эдэр уол кэлбитэ. Кинилэртэн биирдэстэрэ Николай Тарскай этэ. Кини: “Тустуу, бокс, штанга курдук олимпийскай көрүҥнэргэ сахалар Аан дойдуга биллиэхпитин сөп эбит”, - диэн бастакы исписэлиистэри бэлэмнииргэ, эбии дьарыктары ыытарга үгүс үлэни ыыппыта, маҥнайгы күрэхтэһиилэри, чөмпүйэнээттэри тэрийбитэ. Саха сиригэр киин сирдэртэн Сойууска биллэр исписэлиистэри аҕалан сүүмэрдээһини көҕүлээбитэ. Өрөспүүбүлүкэ хамаандаларын биирдиилээн ыспарсымыаннарын Саха сирин тас өттүнээҕи куораттарга доҕордуу көрсүһүүлэргэ, Арассыыйа, Сойуус таһымнаах түһүлгэлэргэ таһаарбыта. Николай Тарскай бирииһигэр көҥүл тустууга өрөспүүбүлүкэ чөмпүйэнээтэ ыытыллар буолан, остуоруйаҕа кини аата, оҥорбут үтүөтэ сөргүтүлүннэ.
Быйыл, 2022 сыл тохсунньутугар, Мэҥэ Хаҥалас улууһугар ыытыллыбыт чөмпүйэнээт түмүгүнэн Мэҥэ-Хаҥалас хамаандата 42 очукуолаах 1 миэстэни ылбыта, кини онно 2 чөмпүйүөннэх, 5 призердаах ырааҕынан атан бастаабыта. 2 миэстэни 64 очукуолаах, 1 чөмпүйүөннээх, 3 призердаах Чурапчы улууһун хамаандата ылбыта. 1 чөмпүйүөннээх, 3 призердаах, 77 очколаах Сунтаар хамаандата 3 миэстэҕэ тахсыбыта. 1 чөмпүйүөннээх, 117 очколаах Уус-Алдан улууһун хамаандата 4 миэстэ буолбута. 118 очколаах, 1 чөмпүйүөннээх, 3 призердаах Үөһээ Бүлүү улууһун тустууктара 5 миэстэҕэ тахсыбыттара. Мантан алын миэстэлэргэ Нам, Таатта, Ньурба улууһун хамаандалара тиксиибиттэрэ.
Оттон быйылгы чөмпүйэнээт, 2023 сылга, Улуу тириэньэр Дмитрий Петрович Коркин, улууска физкултуурунай хамсааһын сайдыытыгар улахан өҥөлөөх Афанасий Кирикович Софронов төрөөбүттэрэ 95, өрөспүүбүлүкэҕэ физкултуурунай хамсааһын 100, Чурапчы нэһилиэгэ тэриллибитэ 375 сыллаах үбүлүөйдэригэр дьоһуннаах саҕалааһын буолара саарбаҕа суох.
Күрэхтэһии үгэс быһыытынан эр дьоҥҥо – 57, 61, 65, 70, 74, 79, 86, 92, 97, 125 киилэҕэ диэри ыйааһыннаах бөҕөстөр икки ардыларыгар ыытыллыаҕа. Чөмпүйэнээт түмүгүнэн бастыҥ ыспарсымыаннар өрөспүүбүлүкэ сүүмэрдэммит хамаандатын састаабыгар киириэхтэрэ.
Тустууну сэҥээрээччилэр успуорт уораҕайыгар бэйэтигэр кэлэн, эбэтэр “Саха” НКИХ ханаалын нөҥүө кэтээн көрүөхтэрин сөп.
Ааптар хаартыската.
-
1
-
0
-
0
-
0
-
0
-
0
