Быстахтык ыллахха: “Уһук Илин эрэгийиэннэригэр салгын аалларынан дьону тиэйии кэбэҕэс буоларын хааччыйар бырагыраамалары кэҥэтэргэ этиитэ киллэриҥ, онуоха сааһынан хааччахтааһыны устарга болҕойуҥ”, -- диэн ыйыллар сорудахха. Дойду баһылыга ааспыт сыл ахсынньы 23 күнүгэр буолбут Госсэбиэт уонна Стратегическай сайдыыга, нацбырайыактарга сэбиэт холбоһуктаах мунньахтарын түмүгэр маннык быһаарыыны ылынна.
РФ бырабыыталыстыбата уонна Госсэбиэт тырааныспарга хамыыһыйата эрэгийиэннэрдээҕи уонна олохтоох салгын аалларынан тиэйии бырагыраамаларын кэҥэтэргэ этиилэрин киллэриэхтээхтэр. Сорудаҕы толоруу б.дь. кулун тутар 15 күнүгэр диэри болдьоххо быһылынна.
Быйылгы бүддьүөккэ Уһук Илинтэн, Симферопольга уонна Калининградка көтүүлэри субсидиялааһыҥҥа 3,8 млрд солк. угуллубута. Онтон ахсынньы 31 күнүгэр Бырабыыталыстыба Бэрэссэдээтэлэ Михаил Мишустин Бэрэсидьиэн Владимир Путинныын көрсүһэригэр Уһук Илиҥҥэ салгын аалларынан көтүүнү субсидиялыырга эбии 5 млрд солк. көрөр буолбуттарын туһунан иһитиннэрэн турар.
Санатан эттэххэ, чэпчэтиилээх билиэтинэн Арассыыйа 23-гэр диэри саастаах олохтоохторо, эр дьон 60, дьахталлар 55 саастарын ааспыт буоллахтарына итиэннэ элбэх оҕолоох дьиэ кэргэн чилиэннэрэ туһанар кыахтаахтар. Ону тэҥэ маннык тарыып I бөлөххө хапсар инбэлииттэргэ уонна кинилэри арыаллааччыларга, төрүөхтэриттэн II уонна III бөлөхтөргө киирэр инбэлиит дьоҥҥо тарҕанар.
-
0
-
0
-
0
-
0
-
0
-
0
