Георгий Павлович Коротов 1913 с. Сунтаар улууһун Аллаҥа нэһилиэгэр төрөөбүтэ. Олохтоох оскуоланы бүтэрэн, 17 саастааҕар ликбиэскэ улахан дьону ааҕарга-суруйарга үөрэппитэ. 1940 с. Москватааҕы түүлээх институтун бүтэрэн, кыылы иитээччи-охотовед дипломун ылбыта. Дойдутугар кэлэн, Булт хаһаайыстыбатын дьыалатын управлениетын начальнигынан, баартыйа обкуомун инструкторынан, тыа хаһаайыстыбатын миниистирин солбуйааччынан, Тыа хаһаайыстыбатын научнай-чинчийэр институтун бастакы дириэктэринэн үлэлээбитэ. Күндү түүлээҕи бултааһыҥҥа, килиэккэлээх кыылы иитиигэ уонна саха сүөһүтүн иитиигэ улахан кылаатын киллэрбитэ. Сахаттан биир бастакынан тыа хаһаайыстыбатын наукатын дуоктара, профессор буолбута.
Бу быыстапкаҕа олунньу 8, 11, 18 уонна 24 күннэригэр «Тоҕо? Агронаукаҕа» диэн бэстибээл ыытыллыаҕа. Бэстибээл бырагырааматыгар маастар-кылаастар, биллэрэр ыстаансыйалар, «төгүрүк остуоллар» буолуохтара.
Бүгүн сарыарда 10.00 чаастан быыстапка аһыллыытын сиэрэ-туома буола турар, салгыы ынах сүөһүнү экстерьеринэн сыаналааһыҥҥа маастар-кылаас ыытыллыаҕа.
Олунньу 11 күнүгэр күнүс 13.00 чаастан бултааһыҥҥа уонна айылҕа харыстабылыгар анаммыт дьаһаллар тэриллиэхтэрэ.
Олунньу 18 күнүгэр күнүс 14.00 чаастан ынах сүөһүнү, сылгыны уонна табаны иитии технологиятыгар аналлаах лиэксийэлэр буолуохтара.
Бэстибээл олунньу 24 күнүгэр күнүс 12.00 чаастан племенной үлэ инновациятыгар анаммыт «төгүрүк остуолунан» итиэннэ үрүҥ аһы астааһыҥҥа маастар-кылааһынан түмүктэниэҕэ.
Профессор Георгий Коротов туһунан сиһилии хаһыат кэлэр нүөмэригэр ааҕыаххыт.
-
6
-
0
-
0
-
0
-
0
-
0
