Прокопий Степанович ааспыт 2022 сылга СӨ Ил Дархан Айсен Николаев тохсунньу 28 күнүнээҕи 1715-РГ дьаһалынан иһитиннэрэр-көрдөрөр сириэстибэлэргэ үрдүк өҥөлөрүн уонна өр сыллаах үлэтин иһин Махтал суругунан бэлиэтэннэ.
73-с хаарыгар үктэммит Прокопий Степанович уопуттаах суруналыыс. М.К. Аммосов аатынан СГУ историко-филологическай факультетын «Филолог» идэтин бүтэрбитэ. Суруналыыс үлэтин Анаабырга тылбаасчыт дуоһунаһыгар саҕалаабыта, онтон САССР Миниистирдэрин Сэбиэтигэр «Гостелерадиоҕа» тыа хаһаайыстыбатын отделын эрэдээктэринэн, старшай кэрэспэдьиэнинэн, «Кыым», «Саха Сирэ» хаһыаттар отделларга сэбиэдиссэйинэн үлэлээбитэ. 1999 сылтан күн бүгүнүгэр диэри «Ил Түмэн» парламент хаһыатын сахалыы таһаарыытын суруналыыһа.
Кини ордук тыа хаһаайыстыбатын, бырамыысыланнаһы, тыа сирин олоҕун, олохтоох бэйэни салайыныы, парламент үлэтин-хамнаһын, билим, устуоруйа уонна култуура эйгэтин сырдатар. Ыстатыйалара ордук ырытыылардаах, судаарыстыба, эрэгийиэн, олох-дьаһах проблемаларын таарыйар, дьон-сэргэ сэҥээритин ылыан-ылар. Кэлэктиипкэ эдэр биир идэлээхтэригэр уопуттаах уһуйааччы буолар.
Биир идэлээхпитин өссө төгүл эҕэрдэлиибит, өр сылларга сытыы бөрүөҥ сыппаабатын диэн баҕа санаабытын тиэрдэбит. Чэгиэн туруктаах, дьоллоох буол диэн алгыспытын аныыбыт.
-
4
-
0
-
0
-
0
-
0
-
0
