Уопсастыба

Бу форум РФ Педагог уонна уhуйааччы, СѲ Үлэ сылларыгар, Хатыы сириттэн тѳрүттээх биллэр бэлитиичэскэй-уопсастыбаннай диэйэтэл М.В. Мегежекскэй тѳрѳѳбүтэ 125  сылыгар ананна. Тэрээhин сүрүн соруга - эдэр педагогтар уонна уhуйааччылар бииргэ үлэлээһиннэрин түмүгүнэн педагогическай маастарыстыбаны үрдэтии, үүнэр кѳлүѳнэни иитиигэ-үѳрэтиигэ педагог эр киһи суолтатын, аптарыатыатын улаатыннарыы буолла.

Форум үөрүүлээх аһыллыытыгар улуус дьаһалтатыттан Николай Иванович Бурнашев, үѳрэх управлениетыттан Елена Мартыновна Котоконова, Мэҥэдьэк нэһилиэгин баһылыга Леонид Александрович Николаев, оскуола дириэктэрэ Владимир Гаврильевич Тимофеев кыттааччылары истиҥник эҕэрдэлээтилэр, эр киһи педагог ыччаты иитиигэ-үөрэтиигэ ылар улахан суолтатын бэлиэтээтилэр, талан ылбыт дьоһуннаах үлэлэригэр ситиһиини баҕардылар.

Барыта Ньурбаттан, Сунтаартан 21 үөрэҕирии тэрилтэтиттэн 57 педагог: учууталлар, уһуйаан иитээччилэрэ, эбии үөрэх педагогтара кыттыыны ыллылар. Эр дьон форума, кинилэр айылҕаттан күрэскэ тардыһыылаахтарын, дьаныардаахтарын, дьулуурдаахтарын туоһулаан, педагогическай ринг киэбинэн барда. Педагогтар билиилэрин, дьоҕурдарын, сатабылларын   түөрт рауннаах икки түһүмэҕинэн түөрт холбоһуктаах хамаандалары тэрийэн, ыытан сыаналанна. Дьүүллүүр сүбэҕэ үлэҕэ опыттаах, дириҥ билиилээх уhуйааччылар үлэлээтилэр.

1 раунд.  «Блиц-ыйытык» (Педагогика араас хайысхаларыгар билиини тургутуу);

2 раунд.  «Кистэлэҥнээх холбука» (Хас биирдии  киһи бэйэтин силиһин билиэхтээх диэн этиигэ олоҕуран, Саха сирин устуоруйатын билиилэрин тургутуу);

3 раунд.  Педагогическэй  идеялар «Swot-ырытыы» - лара (Педагогтар анааран ырытар сатабыллара көстүөхтээх: үтүө, мөкү өрүттэри чопчу быһаарыахтаахтар);

4 раунд.  «Финал» ( Драфт-бырайыагы көмүскээһин, саҕаламмыты ситэрии).

Күрэхтэһии түмүгүнэн икки үрдүк бааллаах хамаандалар – Саарыннар уонна Үрүҥ Уоланнар  финалга бастыыр иһин үс раундунан күрэхтэстилэр.

Педагогическай ринг кэнниттэн ыалдьыттар  нэһилиэкпит “Дьөһөгөй оҕото” түмэлин көрдүлэр.  Тыҥааһыннаах педагогическай ринг кэнниттэн “Иҥиир ситиилиин иилистэ, быччыҥ быыппаста” өбүгэ оонньууларыттан таҥыллыбыт, нэһилиэккэ мэлдьи ыытыллар 12 күрэх  5 – тии киһилээх хамаандалар ортолоругар Култуура киинигэр эрийсиилээхтик ааста.

Оттон анал байыаннай дьайыыга сылдьар биир дойдулаахтарбытыгар анаан, “Мы  вместе!”  акция - аукцион  көхтөөхтүк ыытылынна.  Барыта 10100 солк. харчы киирэн туһааннаах тэрилтэҕэ тиксэриллиэ.

Хатыы, Маалыкай оскуолаларын бизнес-инкубатордара атыы – эргиэн быыстапкатын үлэлэттилэр. Бэйэлэрэ оҥорбут мыылаларын, сиэл тымырдаайыларын, сувенирдарын, трайфллары, ону таһынан, бэйэбитигэр үүнэр эмтээх оттору, Хатыы оскуолата бэчээттэппит кинигэлэрин атыылаатылар. Хатыы оскуолатын үөрэнээччилэр оройуоҥҥа бырайыак көмүскээн кыайан, таҥаска, туттар тэрилгэ ойуу түһэрэр принтер ылбыттарынан баҕалаахтарга футболкаларыгар, чааскыга бэйэлэрин өҥөлөрүн оҥордулар.

Көрүүгэ “М.В. Мегежекскэй  - 125”,  “Хоhуун”  лааҕыр”, оскуолаҕа үлэлии сылдьыбыт эр дьон – педагогтар “Уhуйааччы педагогтар”, технология учуутала Анисимов Федор Федорович үөрэнээччилэрэ мастан, таба муоһуттан чочуйан оҥорбут оҥоһуктарын, доруобуйатынан хааччахтаах, IV кылаас үөрэнээччитэ Егоров Айаал уруһуйдарын уонна панноларын, саха тылын учуутала Ирина Ивановна Васильева салайар үөрэнээччилэрин оҕуруонан кыыс симэхтэрин уонна броштарын, алын кылаас үөрэнээччилэрэ С.А. Новгородов алфавитын үтүктэн оҥорбут панноларын быыстапкалара икки кабинеты, оскуола көрүдүөрүн  киэптии уурулунна.

Форум үөрүүлээх сабыллыыта нэһилиэк И.Я. Танхаров аатынан “Түөлбэ” КК буолла. Форум эр киһи педагог иитэр-үөрэтэр үлэтигэр, үүнэригэр-сайдарыгар, олоҕор-дьаһаҕар сыһыаннаах резолюция ылынна.

Кыттааччылар форум үлэтигэр көхтөөх кыттыыларын иһин туоһу сурук туттулар. Педагогическай рингэҕэ I миэстэни  “Саарыннар” хамаанда, II миэстэни  “Үрүҥ Уоланнар” хамаанда ыллылар. Өбүгэ оонньууларын күрэҕэр I миэстэни Хатыы – Малдьаҕар хамаандата, II миэстэни Ньурба куорат оскуолаларын хамаандата, III миэстэни холбоһуктаах хамаанда, IV миэстэни Маалыкай оскуолатын хамаандата ыллылар. Форуму сүр көтөҕөр оһуохай түмүктээтэ.

Форум устуоруйатын кылгастык кэпсиир буоллахха, I педагог эр дьон форумнара 2017 сыллаахха улууспутугар Маарга улуус оскуола иннинээҕи үѳрэх тэрилтэлэрин уонна алын сүһүөх кылаастарын педагогтарын түмпүтэ. II форум 2020 сыллаахха Малдьаҕарга ыытыллыбыта. Оттон 2020 сыллаахха Маалыкайга буолбут III форум Бүлүү бөлөх улуустарыттан педагогтары кытыннарбыта. IV форум 2022 сыллаахха Ньурбачааҥҥа буолбута.

Бу ыытыллыбыт биэс форумҥа барытыгар сылдьыбыт, Хатыыга кэлбит педагогтарынан Владимиров Егор Кириллович, Антоновкатааҕы ”Ромашка” уһуйаан сэбиэдиссэйэ, Семенов Александр Николаевич, Ньурбатааҕы “Туллукчаан” уһуйаан сэбиэдиссэйэ; Васильев Максим Иннокентьевич, Ньурбатааҕы “Аленушка” уһуйаан физруга; Сидоров Степан Гаврильевич,  Ньурбачааннааҕы “Сайдыы” уһуйаан физруга эбиттэр. Саамай элбэх – 35 сыл үлэ ыстаастаах педагог, уруккута улуус саамай кырдьаҕас бастакы оскуолатын, билигин Ньурба гимназиятын  физруга Петров Анатолий Николаевич, уонна эмиэ физрук, 34 сыл үлэ ыстаастаах Чуукаар оскуолатыттан Николаев Василий Васильевич буолаллар.