Улуус баһылыга М.М. Соров, өрөспүүбүлүкэ Уопсастыбаннай палаататын чилиэнэ, “Саха Өрөспүүүбүлүкэтин саллааттарын уонна мотуруостарын төрөппүттэрин кэмитиэтэ” уопсастыбаннай түмсүү бэрэссэдээтэлэ М.Е.Емельянова, улуус баһылыгын социальнай боппуруостарга солбуйааччы А.Г.Гуляева, улуустааҕы үөрэх салаатын салайааччы В.В.Кривошапкин, Таатта-Чурапчы улуустарын военкома П.П.Никифоров, өрөспүүбүлүкэ үөрэҕириитин туйгуна, “Бэргэн” байыаннай-патриотическай кулууп салайааччыта, “Патриот” дойду национальнай бириэмийэтин лауреата И.Ю.Тарасенко, Таатта улууһунааҕы 32 №-дээх судаарыстыбаннай баһаарынай сулууспа отделын начальнигын солбуйааччы, Таатта улууһун хаһаахтарын түмсүүтүн атамаана И.Ф.Рахлеев дойдуга бэриниилээх буолууга, эр санааланыыга, аҕа саастаах көлүөнэни холобур оҥостууга туһаайан холобурдары аҕаллылар, эҕэрдэ тыл эттилэр.
Улууска “Движение первых” Арассыыйатааҕы оҕо-ыччат хамсааһынын салаата тэрилиннэ, улуус баһылыгын, үөрэх салаатын салайааччытын, “Үрдэл” улуустааҕы оҕо хамсааһынын салайааччытын кытта, бииргэ үлэлииргэ илии баттанна.
Өрөспүүбүлүкэтээҕи “Юные якутяне” ресурснай киин методиһа А.Д.Васильев Арассыыйатааҕы оҕо-ыччат хамсааһынын үлэтин сырдатта уонна улууска тэриллибит саҥа түмсүүнү эҕэрдэлээтэ.
Пуорумҥа Ытык Күөл 1 №-дээх, 2 №-дээх оскуолалара, лицей, Туора Күөл, Даайа Амматын, Чычымах, Чымынаайы, Уус Таатта, Дьохсоҕон, Чөркөөх, Тыараһа, Игидэй, Харбалаах, Хара Алдан, Уолба оскуолалара “Ытык маллар” уонна оскуола иһинэн үлэлиир байыаннай-патриотическай кулууптар үлэлэрин сырдатар быыстапкалары туруордулар.
Ол курдук, дьохсоҕоннор Ильмень күөл аттынааҕы Рамышева дэриэбинэҕэ көрдүүр-чинчийэр этэрээккэ үлэлээбиттэрин, Нажим Нестерев аатын сүгэр “Сайдам” оҕо тэрилтэтэ, чөркөөхтөр “Они стояли у истоков Автономии Якутии” бырайыактарын, уолбалар “Албан аат суолунан”, “Айхал” спортивнай кулууп, Алампа аатынан Ытык Күөллээҕи 1 №-дээх орто оскуола “Бэргэн” кулууп үлэлэрин, Ытык Күөл 2 №-дээх оскуола “Албан Аат” уордьан толору кавалерын туһунан бырайыагы кэпсээтилэр.
Күнүстэн киэһэ үс былаһаакканан оҕо хамсааһыннарын саҥа сүүрээннэригэр, патриотическай иитиигэ, иһитиннэрэр-медийнай хайысхаларынан кэпсэтиилэр ыытылыннылар.
-
9
-
0
-
0
-
0
-
0
-
0
