Дьоро күн бэйэлэрин эҕэрдэлэрин улуус баһылыгын социальнай боппуруоска солбуйааччы Нюргуяна Илларионова, үөрэх салалтатын начаалынньыга Юрий Шишигин тиэртилэр.
Күрэххэ Абаҕаттан Эдилия Третьякова ийэтинээн Агафья Игнатьевналыын, Сатаҕайтан Инна Онуфриева ийэтинээн Анна Васильевналыын, Соморсунтан Алина Максимова ийэтинээн Елена Романовналыын, Чапчылҕантан Нарыйаана Ефремова ийэтинээн Надежда Елисеевналыын кыттыыны ыллылар. Оттон Амматааҕы лиссиэйтэн Вика Александрова ийэтинээн Елена Семеновналыын, Айна Чаприна ийэтинээн Анна Егоровналыын кытыннылар.
Күрэх 3 түһүмэҕинэн бэрт сэргэхтик ааста. Кыттааччылар дьиэ кэргэттэрин, дьарыктарын, дьоҕурдарын туһунан кэпсээтилэр, бэйэлэрин билиһиннэрдилэр.
Күрэх түмүгэр III бочуоттаах миэстэҕэ Соморсунтан Максимовтар дьиэ кэргэннэрэ таҕыстылар. Иккис миэстэни Амматтан Чаприннар ыллылар. Кыайыылаах үрдүк аатын Амматтан Елена уонна Вика Александровалар сүктүлэр. Кыттыбыт бары дьиэ кэргэттэргэ барыларыгар анал ааттары, махтал суруктары туттардылар.
“Бу күрэх сыалынан кыыс оҕону сахалыы сиэр-майгы, өй-санаа өттүнэн сайыннарыы, кыыс уонна ийэ иһирэх сыһыанын чиҥэтии, кыыс оҕо олоҕу салҕааччы буоларын бигэргэтии буолар. Кыыс кэлин бэйэтин холобурунан оҕолорун иитэрин, өбүгэ үтүө үгэстэрин тарҕатарын, ситимнээччи буоларын билиэхтээх. Кини ииһи билэ улаатыахтаах, бу дьарык абылаҥнарын баһылаан, олоҕор сатабыллаах, ситиһиилээх буола улаатар. Кэлин ийэ буоллаҕына, сатабыла туһа буолара саарбахтаммат», -диэн бырайыак ааптара Ньургуйаана Михайловна Колосова санаатын үллэһиннэ.
- 0
- 0
- 0
- 0
- 0
- 0