Уопсастыба

Кыраайы үөрэтээччилэр улууска  2016 с. түмсүү тэринэн үлэлииллэр, ааҕыылар түмүктэринэн "Сир түннүгэ" диэн анал сурунаалы таһаараллар. Быйылгы дьаһалга  Чурапчы кыраайы үөрэтээччилэрэ кыттыыны ыллылар. Ааҕыылар аһыллыыларыгар улуус баһылыгын солбуйааччы А.Г.Гуляева, Норуот айымньытын дьиэтин салайааччы Г.Г.Вырдылин, түмсүү салайааччыта И.А.Сивцева эҕэрдэ тыллары эттилэр. «Албан Аат» кыраайы үөрэтэр мусуой салайааччыта М.А.Попова айылҕаттан дэгиттэр киһи, тыыннааҕар «Сир түннүгэ» диэн ааттаммыт Е.Д.Андросов туһунан "Егор Дмитриевич эйгэтэ" быыстапканы сырдатта.

Экспердэринэн педнаука кандидата И.А.Сивцева, история учууталлара Н.К. Малышева, В.В.Бурнашева, мусуой үлэһиттэрэ А.Н.Постникова, В.А.Канаева үлэлээтилэр. Ааҕыыларга оскуола үөрэнээччилэрэ көхтөөхтүк кыттыбыттара  ааҕыы кэскиллээҕин көрдөрдө. Ол курдук, Баайаҕа оскуолатын үһүс  кылааһын үөрэнээччилэрэ Диана Уранаева, Валерия Луковцева нэһилиэктээҕи кыраайы үөрэтэр мусуой экспонаттарыгар  олоҕуран, өбүгэ иһиттэригэр  ыйытык ыыппыттара  кэрэхсэннэ.

М.В.Дьячковскай,  Эрчим Бурнашев, Анна Романова  гражданскай сэрии уонна репрессия тиэмэтигэр көрдөөһүннэрин,  Г.С.Попова, саха чулууларын Л.М.Григорьева, Радион Портнягин, Чөркөөхтөн Г.Г.Вырдылин нэһилиэк 858 сирин аатын электроннай картаҕа киллэрбиттэрин туһунан кэпсээтилэр, оттон И.А.Сивцева Таатта үһүйээннэригэр тохтоотулар. Атыттар эмиэ итинник араас тиэмэлэринэн дакылаат аахтылар.  

Ааҕыылар түмүктэринэн Г.Г.Вырдылин, Эрсан Макаров, Г.С.Попова, А.Н.Постникова, И.А.Сивцева, Л.М.Григорьева, Гаврил Попов, М.В. Дьячковскай, П.П.Егорова өрөспүүбүлүкэтээҕи ааҕыыларга кыттар буоллулар.

Бу курдук, сыллата ыытыллар ааҕыылар билигин да история чахчылара тахсан үөрэтиллэрин, кыттааччылар саҥаттан саҥа билиини, дьоҥҥо тиэрдиигэ улахан оруолаахтара көрдөрөр. Төрөөбүт дойду дьиҥ историята --  бу хас биирдиибит дьыалата.