Таатта улууһун Уопсастыбаннай ыстаабын ыҥырыытынан, Дьокуускай куораттан «Илии сылааһа» диэн Саха Сирин ийэлэрин иистэнэр сыаҕын маастардара анал байыаннай дьайыыга сылдьар биир дойдулаахтарбытыгар анаан таҥаһы тигиигэ үөрэҕи ыыттылар.
Бу иистэнэр сыаҕы Тааттаттан тардыылаах Ирина Саввина салайар. Сыах маастардара Айталина Рожина уонна биир дойдулаахпыт Александра Аммосова Таатта, Дьохсоҕон, Октябрьскай, Орто Амма, Амма, Уус Амма, Баайаҕа, Уолба, Игидэй нэһилиэктэриттэн мустубут иистэнньэҥнэргэ анал таҥас хас да көрүҥүн тигэргэ үөрэттилэр.
Үөрэх кэмигэр аҕыс «Эр хоһуун» диэн кэмпилиэги тигэн, уоппускаҕа кэлэр биир дойдулаахтарбытыгар туттарыллыаҕа. Уопсастыбаннай хамсааһынын улуустааҕы түмсүүтүн салайааччы Алена Гуляева үөрэтэ кэлбит сыах үлэһиттэригэр улуус баһылыга М.М. Соров «Махтал суругун», алаас ахтылҕаннаах аһын кэмпилиэгин туттарда.
Алампа аатынан норуот айымньытын дьиэтин дириэктэрэ Изабелла Жараева Дьохсоҕон нэһилиэгин баһылыгын П.Е.Захаров «Эҕэрдэ суругун», өйдөбүнньүк бэлэҕин туттарда. Таатта нэһилиэгин олохтооҕо Александра Прудецкая иистэнэр массыынатын бу сыахха бэлэхтээн, үтүө санаа холобурун көрдөрдө.
Маннык күргүөмүнэн түмсэн, ийэлии бастыҥ санааны иҥэрэн, уолаттарбыт санааларыгыр күүс эбэн, бөҕөргөтөн биэрэбит.
-
19
-
2
-
0
-
0
-
0
-
0
