«Якутия» авиахампаанньа өрөгөйдөөх Улуу Кыайыы күнүн көрсө сэрии кыттыылаахтарыгар уонна инбэлииттэригэр, Ленинград былакаадатын олохтоохторугар расписание рейстэринэн Саха Сиригэр уонна Арассыыйа иһинэн үөһэнэн буор босхо кэлэр-барар айан-сырыыга сылдьалларыгар кыах биэрэр.
Түгэнинэн туһанан, авиахампаанньа бары бэтэрээннэри кэлэн иһэр бэлиэ күнүнэн итиитик-истиҥник эҕэрдэлиир уонна үөрүүнү-көтүүнү, чэгиэн-чэбдик буолууну, үтүө санааны баҕарар. Сылын ахсын ыытыллар үгэс буолбут «Кыайыы күнэ» аахсыйа социальнай-аһымал бырагыраама чэрчитинэн ыытыллар уонна бэтэрээннэр өйдөбүнньүк миэстэлэргэ сылдьалларыгар, фронтовик табаарыстарын кытта көрүсүһэллэригэр ананар.
«Бу аахсыйанан биһиги Аҕа дойду Улуу сэриитин бэтэрээннэригэр ытыктабылбытын уонна махталбытын тиэрдэбит», — диэн авиахампанньа үлэһиттэрэ бэлиэтииллэр. «Кыайыы күнэ» аахсыйанан эбии биир аргыска 85% чэпчэтиилээх билиэт эмиэ көрүллэр. Билет атыылааһынын болдьоҕо: муус устар 20 күнүттэн ыам ыйын 15 күнүгэр диэри. Айан-сырыы кэмэ: муус устар 25 күнүттэн ыам ыйын 15 күнүгэр диэри. Бэтэрээннэргэ уонна арыаллыыр аргыска билеты бронньааһын биир сакааһынан оҥоһуллар. «Кыайыы күнэ» аахсыйа чэрчитинэн авиабилеттэри ааҕыныстыбалар кассаларыгар туһааннаах дастабырыанньалаах оҥотторуохха сөп.
- 2
- 0
- 0
- 0
- 0
- 0