Тэрээһини саҕалыыыргар кыраайы үөрэтэр түмэл салайааччыта Маргарита Попова саха норуотугар улуу дьону үөскэппит Баай оҕо Балбаахтан тэнийбит Слепцовтарга тиийэ сиһилии кэпсээтэ.
Библиограф Устиния Заболоцкая «Улуус историятын үөрэтээччи уонна сурукка тиһээччи» кинигэ быыстапкатын күөнүгэр Федора Михайловнаны кыраайы үөрэтээччи уонна кинигэни түмэн-хомуйан оҥорооччу быһыытынан сырдатта.
Кэрэхсэбиллээх ахтыыны Федора Харитонова оҕо сааһын дьүөгэтэ, кинигэ хомуйан оҥорооччу, бэтэрээн учуутал Мария Колесова оҥордо, муниципальнай сулууспа бэтэрээннэрэ Маргарита Николаева, Марфа Аммосова кинини үлэҕэ бэриниилээх, эппиэтинэстээх киһи быһыытынан арыйдылар.
Федора Михайловна архыып матырыйаалларыгар уонна аҕатын, улууска түмэл уонна библиотека салайааччытынан үлэлээбит, кыраайы үөрэтээччи Михаил Слепцов матырыйаалларыгар олоҕуран, «Ытык Күөл», «Отец Иннокентий», «Кыайыгый бөлүһүөгэ М.Г.Слепцов» уо.д.а кинигэлэри суруйан бэчээттэппитэ. Кинигэни оҥоруу элбэх бириэмэни ыларын, холобур, «Ытык Күөл» диэн кинигэҕэ сэттэ сыл үлэлээбитин туһунан улуустааҕы архыыбын сэбиэдиссэйэ Лариса Слепцова кэпсээтэ.
Онтон педагогическай үлэ бэтэрээннэрэ, эмиэ кинигэни хомуйан оҥорор идэлээх Ксения Хатылыкова уонна Елена Кузьмина дьоро киэһэ "буруйдааҕа" Федора Михайловна устуоруйаҕа олус суолталаах, дириҥ ис хоһоонноох кинигэлэри инникитин да таһаара турарыгар баҕа санааларын эттилэр.
Федора Михайловна аҕатын Михаил Слепцов түһэрбит хаартыскаларынан быыстапка оҥоһуллубута урукку уонна билиҥҥи кэм алтыһыыларын көрдөрдө. Кыраайы үөрэтээччини улуустааҕы норуот айымньытын дьиэтэ, «Таатта» литернай-художественнай түмэл-заповедник, А.И.Аргунов аатынан улуустааҕы киин библиотека кэлэктиибтэрэ, аймахтара уо.д.а. эҕэрдэлээтилэр.
-
2
-
1
-
0
-
0
-
0
-
0
