Нацисткай Германияны Кыайыы дойдубут элбэх омуктаах норуотун сөҕүмэр сомоҕолоһуутун, сүҥкэн дьулуурун уонна хорсун быһыытын үйэлэргэ кэрэһилиир. Биһиги дойдубутугар түөкүннүү саба түспүт немец-фашист халабырдьыттарын утары кырыктаах кыргыһыы хонуутугар биһиги эһээлэрбит уонна аҕаларбыт өстөөҕү самнарбыттара, Европа дойдуларын фашизм хара дьайыттан босхолообуттара. Ийэ дойдуга муҥура суох тапталларынан, бэриниилэринэн, кыргыһыы хонуутугар уонна тыылга ахсаана суох геройдуу быһыыны көрдөрөн, биһиги норуоппут дойдубут көҥүлүн уонна тутулуга суох буолуутун турууласпыта.
Кыайыы күнэ – биһиги норуоппутугар, Саха сирин хас биирдии олохтооҕор ытык күн. Саха сириттэн Сэбиэскэй Сойуус Дьоруойа буолбут 25 киһи аата Кыайыы лиэтэпиһигэр көмүс буукубаларынан суруллубуттара.
Бу дьыл муус устарга Арассыыйа Федерациятын Президенин Ыйааҕынан анал байыаннай дьайыы кыттыылааҕар, «Барс-2» доброволецтар батальоннарын састаабыгар киирэр «Боотур-1» сахалар этэрээттэрин хамандыырыгар Александр Колесовка Арассыыйа Дьоруойун үрдүк аата иҥэрилиннэ.
Анал байыаннай дьайыыга Аҕа дойдубут интэриэһин, эйэлээх олоҕу уонна дойдубут суверенитетын көмүскүүр кэммитигэр кыайыылаах-хотуулаах көлүөнэ чаҕылхай холобура биһиэхэ улахан суолталаах. Аҕа дойду Улуу сэриитин кэмигэр Ийэ дойдуларын көмүскээбит эһээлэрбититтэн, аҕаларбытыттан норуоппут күүс-уох ылар, кыайыыны уһансарга үөрэнэр. Кинилэр хорсун быһыылара фашизмы утары охсуһууга тулуурдаах, дьулуурдаах буоларга, национальнай лидербыт тула сомоҕолоһорго, улуу Россиябытын таптыырга уонна көмүскүүргэ үөрэтэр. Кыайыыны аҕалбыт дьон оҕолоро уонна сиэннэрэ көҥүл, кырдьык уонна сиэрдээх буолуу иһин билигин охсуһууга туруннулар.
Биһиги хаан тохтуулаах кыргыһыыларга фашистскай Германияны самнарбыт буойуннарбытынан, тыылга Кыайыыны уһансыбыт уонна сэрии кэннинээҕи аас-туор сылларга дойдуну чөлгө түһэриигэ бэйэлэрин харыстаммакка үлэлээбит дьоммутунан киэн туттабыт. Хас биирдии дьиэ кэргэҥҥэ фронтовиктар уонна тыыл үлэһиттэрин сырдык ааттарын кэриэстииллэр. Бэтэрээннэрбитигэр сылаас сыһыаммыт, истиҥ болҕомтобут – биһиги ытык иэспит.
1941 сыл атырдьах ыйын 1 күнүгэр Саха сирин үлэһит дьонун көҕүлээһининэн “Оборуона пуондата” тэриллибитэ. 2023 сыл бэс ыйын 1 күнүгэр Саха сиригэр, дойдубут атын эрэгийиэннэригэр курдук, Президент Владимир Путин Ыйааҕынан тэриллибит «Аҕа дойду көмүскээччилэрэ» Судаарыстыбаннай пуонда эрэгийиэннээҕи салаата үлэтин саҕалыаҕа. Билигин өрөспүүбүлүкэҕэ анал байыаннай дьайыы кыттыылаахтарын уонна кинилэр дьиэ кэргэннэрин өйүүр 19 дьаһал үлэлиир, оттон «Аҕа дойду көмүскээччилэрэ» пуонда эрэгийиэннээҕи салаатын арыллыыта анал байыаннай дьайыы кыттыылаахтарыгар уонна кинилэр дьиэ кэргэннэригэр көмө хайысхаларын өссө кэҥэтиэ.
Ытыктабыллаах бэтэрээннэрбитигэр хорсун быһыыгыт иһин муҥура суох махтанабыт! Аҕа дойдубут иһин кыргыһыы толоонугар охтубут буойуннарбыт ааттара үйэлэргэ умнуллубатын!
Кыайыыны ситиспит норуокка – албан аат! Инникитин даҕаны кыайыы көтөллөөх буолуохпут! Кыайыы күнүнэн!
Саха Өрөспүүбүлүкэтин Ил Дархана Айсен Николаев
-
1
-
0
-
0
-
0
-
0
-
0
