Үп-харчы
Тыа хаһаайыстыбатын министиэристибэтэ иһитиннэрэринэн, сааскы ыһыы үлэтин тэрийэргэ 192 мөл. солк. харчы көрүллүбүтүттэн тустаах хаһаайыстыбаларга 96 %-а, ол эбэтэр 184 мөл. солк., өссө кулун тутартан саҕалаан тиэрдиллэн, туһанылла сылдьар.
Сиэмэ хаһаайыстыбаларын сайыннарарга 39,7 мөл солк тыырыллыбыт. Ол иһигэр, 86 туонна бурдук сиэмэтин уонна 1 тыһ туонна сиэмэ хортуоппуйу атыылаһарга 27 мөл. солк. көрүллэн, 42 хаһаайыстыбаҕа субсидия быһыытынан бэриллибит. Ыһыы сиэмэтин өрөспүүбүлүкэ таһыттан аҕалыыны аҕыйатар сыалтан, кэлэр 2024 сылга 560 туонна хортуоппуй элита сиэмэтин итиэннэ 2,5 тыһ туонна бурдук сиэмэтин хааччыйалларыгар анаан олохтоох сиэмэ хаһаайыстыбаларыгар 12,5 мөл солк. өйөбүл оҥоһуллубут.
Минеральнай уоҕурдууну, пестицидтэри, үүнээйини харыстыыр сириэстибэлэри атыылаһарга 31 мөл. солк көрүллэн, хаһаайыстыбалар 1 057 туонна уоҕурдууну (721 туонна азофосканы, 123 туонна карбамиды, 212 туонна диаммофосканы) аҕалтарбыттар.
Сиэмэ
Ыһыыга бэлэмнэнии, сиэмэни, уоҕурдууну тиэрдии үлэтэ эрдэттэн тэриллибит. Бурдук ыһыытыгар 1 864 туонна сиэмэ ирдэнэриттэн 491 туоннатын, сүөһү аһылыгын култууратын сиэмэтин 42 %-ын, хортуоппуй сиэмэтин 80 %-ын улуустар бэйэлэрэ хааччыммыттар.
Тиийбэт сиэмэни уонна уоҕурдууну «Туймаада Агрохолдинг», «Агрокорм» уонна «Агротрейд» хампаанньалар кыһыҥҥы суолу баттаһа өрөспүүбүлүкэ таһыттан аҕалтарбыттар. Бурдук уонна от сиэмэтин Алтайтан, Новосибирскайтан, Тюмень уобалаһыттан, хортуоппуй сиэмэтин Алтайтан, Приморьеттан, Иркутскай уонна Амур уобаластарыттан атыыласпыттар.
Тиэхиньикэ
Сир үлэтигэр сүрүн оруолу тиэхиньикэ ылар. Ил Дархан өйөбүлүнэн, тиэхиньикэни саҥардыы үлэтэ утумнаахтык барар. Быйыл бырагыраама куонкуруһа бурдугу 100 гектартан итэҕэһэ суох бааһынаҕа ыһар, хортуоппуйу 20 гектартан итэҕэһэ суох бааһынаҕа олордор хаһаайыстыбаларга ыытыллыбыта. Ол түмүгүнэн Амма, Мэҥэ Хаҥалас, Нам, Өлүөхүмэ, Уус Алдан, Хаҥалас, Сунтаар, Чурапчы улуустарыттан уонна Дьокуускай куораттан 15 хаһаайыстыба тиэхиньикэ атыыласпыт ороскуоттарын сорох чааһын толуйар субсидиянан туһанар буоллулар. Кинилэр «Росагролизинг» нөҥүө 79 мөл. солк суумалаах 19 тиэхиникэни: алта тыраахтары, үс бурдугу быһар хамбаайыны, сэттэ хортуоппуйу хомуйар хамбаайыны, икки ыһар комплексы, биир диискэлээх барананы атыыластылар. Бастакы тыраахтардар ыам ыйын бүтүүтүгэр кэлэннэр, бааһыналарга үлэлии-хамсыы сылдьаллар.
Түмүктүүр кирбии
Ыам ыйын устатыгар уонна бэс ыйын саҥатыгар төһө да ардаабатар, ааспыт күһүн сир «тот» тоҥмут уонна кыһын хаар халыҥ буолан, бааһына сөбүгэр сииктээх этэ. Инньэ гынан, хаһаайыстыбалар ыһыы үлэтин кэмигэр саҕалаан, түмүктээн эрэллэр.
Бэс ыйын 14 күнүнээҕи туругунан, бурдук 10 652 (сэлиэһинэй 1 452, ньэчимиэн 2 413, эбиэс 6 786) гектар бааһынаҕа ыһылынна. Ити былаан 98 %-а. Амма, Уус Алдан, Бүлүү, Ленскэй, Таатта улуустара уонна Дьокуускай куорат таһынааҕы хаһаайыстыбалар сорудахтарын 100 %, Хаҥалас улууһа сорудаҕын 118 % (2 182 гектар) толордулар!
Сүөһү сир култуурата 19 249 (биир сыллаах от 6 498, элбэх сыллаах от 12 751) гектарга ыһыллан, былаан 65 % толоруллан иһэр. Оттон хортуоппуй 6 тыһ. гектарга (90 %), оҕуруот аһа 1,1 тыһ. гектарга олордулунна.
Хаартыскалары Тыа хаһаайыстыбатын министиэристибэтин пресс-киинэ хааччыйда
-
0
-
0
-
0
-
0
-
0
-
0
