Олоҥхо ыһыаҕар олохтоохтортон уонна араас улуустартан балачча элбэх волонтер түмүллүбүт. Холобур, биһиэхэ, өрөспүүбүлүкэ иһитиннэрэр-биллэрэр маассабай сириэстибэлэрин үлэһиттэригэр, икки волонтер сыһыарыллан үлэлээбиттэрэ: Уус Ньаратааҕы бэтэринээринэй учаастак сэбиэдиссэйэ Анна Азарова уонна Дьокуускайтан тиийбит Мария Емельянова. Кинилэр суруналыыстар түһүлгэлэринэн сылдьан, матырыйаал хомуйар кэмнэригэр павильон ыраас, утатан кэлэр дьоҥҥо ас-үөл, утах баар буоларын хааччыйбыттара, аппаратураны көрбүттэрэ-истибиттэрэ.
Мария Егоровна Емельянова өрөспүүбүлүкэҕэ биллэр-көстөр, ытыктанар киһи. Саллааттар уонна мотуруостар төрөппүттэрин өрөспүүбүлүкэтээҕи кэмитиэтин бэрэссэдээтэлэ. Кини Олоҥхо ыһыаҕар «Үрүҥ көмүс» волонтер буолан бэйэтэ тиийбит.
Волонтердуурун быыһыгар анал байыаннай дьайыыттан кэлбит байыастары уонна кинилэр төрөппүттэрин, кэргэннэрин кытары көрсөн, кэккэ боппуруостары быһаарыста. Ол курдук уола сэриигэ өлбүт аҥардас аҕа көрүллүбүт көмө харчыта бэриллэ илигин туһунан кэпсээбитин, уталыппакка бырабыыталыстыба бэрэссэдээтэлин солбуйааччытыгар этэн, боппуруос сотору кэминэн быһаарыллар буолла. Оҕолоро биитэр кэргэттэрэ анал байыаннай дьайыыга сылдьар ийэлэргэ онно быһыы-майгы хайдаҕын, көмө хайдах быһыылаахтык тэриллэрин туһунан кэпсээтэ, уоскутта.
Үрүҥ көмүс волонтерга от ыйын 1 күнэ икки бүк долгутуулаах буолла: Тымныы оройугар, Томторго, Олоҥхо ыһыаҕын аһыллыыта итиэннэ... Арассыыйаҕа Бойобуой дьайыылар бэтэрээннэрин күнэ.
– Билигин инники кирбиигэ сылдьар уолаттарбыттан батсаабынан илии күөрэҥнэс. Барахсаттарым: «Барыта этэҥҥэ», «тыыннаахпыт» дэһэллэр, – диэн Мария Егоровна долгуйбутун кистээбэт.
-
5
-
0
-
0
-
0
-
0
-
0
