Общество

Саха киһитэ олоҕун устата өбүгэ сиэрин-туомун тутуһан олорор, бу үгэс бүгүҥҥү форумҥа тутаах сирдьит буолла. “Алгыс” балаҕаҥҥа АБДЬы байыастарын төрөппүттэрэ, ыал ийэлэрэ-аҕалара Прасковья Петрова- Күн Көмүсчээнэ ыраастаныы сиэригэ-туомугар сырыттылар. Форум ыалдьыттарынан тумус туттар дьоммут 35-с сылын Саллааттар ийэлэрэ диэн үрдүк ааты сүгэр Мария Емельянова, байыаннай юрист Николай Сыромятников, киэн туттар биир дойдулаахтарбыт, АБДьы волонтердара бырааттыы Николай, Иван Мочкиннар буоллулар.

Форуму улуус баһылыгын социальнай политикаҕа солбуйааччы Никифор Жерготов салайан ыытта. Волотерскай үлэ туһунан сырдатыылары, тус санааларын улуус депутаттарын мунньаҕын бэрэссэдээтэлэ Петр Максимов, Таатта нэһилиэгин баһылыга Егор Павлов, улуустааҕы Норуот айымньытын дьиэтин салайааччыта Изабелла Сивцева оҥордулар. Ону таһынан олус наадалаах боппуруостары бүгүҥҥү форуммут ыалдьыттара таарыйан кэпсээтилэр.

Форум устата нэһилиэктэринэн волонтерскай үлэни сырдатар стендэлэр, анал байыаннай дьайыыга сылдьар биир дойдулаахтарбытыгар туһалаах анал оҥоһуктар, иистэр, кинилэр санааларын бөҕөргөтөр сахалыы тыыннаах “Биэс харах”, “Туос” харысхаллары, кылтан-сиэлтэн угунньу оҥорууга, уустук быһыыга-майгыга тутуллар “Браслет выживания” маастар- кылаастар ыытылыннылар.

Волонтерскай үлэ биир хайысхатынан иис буолар, улуус киинигэр төрдүс сылларын илиилэрин араарбаакка “Харыстаана” иис сыаҕын (сал. Анна Никифорова) үлэтэ, итиэннэ Игидэй “Туос тойуга” иис түмсүүтүн (сал. Мария Алексеева), Дьохсоҕон, Уус Амма олохтоохторун иистэрэ, ыраастаныы сиэригэр туттуллар от набордара, кылтан массажердар, угунньалар, сискэ кэтиллэр бааччылар, кээнчэлэр быыстапкаҕа турдулар.

Таатта, Дьохсоҕон, Тыарааһа, Дьүлэй, Игидэй, Амма, Уус Амма, Алдан нэһилиэктэрин волонтерскай үлэлэрин сырдатар стендэлэр биир боччум миэстэни ылла. Ону тэҥэ пленарнай чааска улуус волонтерскай үлэтин сэргэ, Аҕа дойду көмүскэлигэр олохторун толук уурбут хорсун буойуттарбыт мөссүөннэринэн виртуальнай быыстапка көрдөрүлүннэ.

Бүччүм санаа кэпсэтиитэ “Алгыс” балаҕаҥҥа тэрилиннэ. Кэпсэтиини АБДЬы волонтера Николай Мочкин ыытта. Санаа баттыгын ыйытыыларынан юрист Николай Сыромятников уонна Саллааттар ийэлэрэ Мария Емельянова уонна улууспут психологическай киинин психологтара үлэлээтилэр.

Бүгүҥҥү Волонтердар форумнарын тэрийээччитэ, исписэлиис Туйара Орлова: “Дойду үрдүнэн уустук кэм, төрдүс сылын Украина сиригэр-уотугар, Аҕа дойдуну көмүскүүр анал байыаннай дьайыыга хорсун санаалаах биир дойдулаахтарбыт кыттыыны ыла сылдьаллар. Ону тэҥэ үтүө санаа холобурунан Тааттабыт улууһун хас биирдии олохтооҕо, ытык кырдьаҕас, бочуоттаах сынньалаҥҥа олорор аҕам саастаах, үлэлээн иитиллээччитэ, ыччат, оскуола үөрэнээччитэ, биир санаанан бу сыллар устата илиилэрин утары уунан көмө оҥорон кэллэ. Бу үтүө холобур сулууспалыы сылдьар биир дойдулаахтарбытыгар, төрөөбүт дойду тирэҕин, ийэ-аҕа, оҕо тапталын күүһүн, биир дойдулаахтар үтүө санааларын тиэрдэн, күүстэригэр күүс эбэр, булгуруйбат санааны үөскэтэр. Улууспутугар волонтерскай хамсааһын үлэтэ, Анал байыаннай дьайыы саҕаланыаҕыттан тэриллибитэ. Ол курдук улуус дьаһалтатын иһинэн ''Вместе к Победе'' штаб тэриллэн, волонтерскай үлэ күүскэ барбыта.

Ити кэмтэн ыла улууспут үтүө санаалаах дьоно түмсэ түһэн, бэйэлэрин баҕа санааларынан АБДЬ-га сылдьар биир дойдулаахтарбытыгар көмөлөһөн туһалаах малы-салы оҥорон, бэйэлэрин кылааттарын киллэрэн кэллилэр. Үгэс буолбут гуманитарнай көмөнү хомуйуу акциятыгар сылын ахсын улууспут нэһилиэктэрэ, тэрилтэлэр, оскуолалар, уһуйааннар, биирдиилээн дьон төһүү күүс буолаллар. Кинилэр күүстээх өйөбүллэринэн, көмөлөрүнэн хас эмит 1000-нан ахсааннаах таҥас-сап, мал-сал, харысхал набордара, буруолатар от хомуллар. Ааспыт сылга волонтерскай гуманитарнай көмөнү тэрийиигэ Тааттабыт улууһа өрөспүүбүлүкэ үс бастыҥ улуустарын иһигэр киирбитин, барыбыт ситиһиитинэн ааҕабыт. Бүгүҥҥү форумҥа кыттыыны ылбыт күндү биир дойдулаахтарбытыгар, саха аймахха туохха да кэмнэммэт өҥөлөөх, суон дурда-хахха буолар ытыктабыллаах Саллааттар ийэлэригэр Мария Егоровнаҕа, юрист Николай Егоровичка, биир дойдулаахтарбытыгар Николай, Иван Мочкиннарга бука бары махтанабыт, сыралаах үлэҕитигэр ситиһиини, кыайыыны-хотууну баҕарабыт”, - диэн санаатын үллэһиннэ. Форумҥа киирбит туһааннаах этиилэринэн резолюция ылыллан, үлэ өссө күүскэ барыаҕа. Бу курдук Таатталар иннибит диэки Кыайыыга хардыылыыбыт.

Вера Канаева, Таатта