Уопсастыба

Быйыл сайын бас билии көрүҥүттэн тутулуга суох, өрөспүүбүлүкэ үрдүнэн 459 тыһыынча 307 туонна от, 23 тыһыынча 885 туонна сиилэс итиэннэ 12 тыһыынча 876 туонна сенаж бэлэмнэниэхтээх. Тыа хаһаайыстыбатын миниистирин солбуйааччы Николай Афанасьев салайааччылаах сүөһү аһылыгын соҕотуопкатын иилиир-саҕалыыр өрөспүүбүлүкэтээҕи ыстаап тэриллэн, өссө бэс ыйын саҥатыттан хас улуус ахсын үлэни сүрүннүүр кииннэр үлэлииллэр. Кинилэр салалталарынан нэһилиэктэр дьаһалталара, тыа хаһаайыстыбатын исписэлиистэрэ уонна хаһаайыстыбалар салайааччылара ходуһаларын кэрийэн көрөн, хайа сир хайдах үүммүтүн, төһө оту биэриэн сөбүн барыллаан көрбүттэрэ. Оттооһуну кэмигэр саҕалыыр туһугар оттугу-уматыгы хааччыммыттара, тиэхиньикэлэрин өрөмүөннээбиттэрэ, ыраах учаастактарга барар суолу-ииһи оҥорбуттара, ходуһалар бүтэйдэрин сөргүппүттэрэ.

Аҕыйах хонуктааҕыта ыытыллыбыт дьаһалта баһылыктарын сүбэ мунньаҕар улуустарга үүнүү туругун иһитиннэрии итиэннэ төһө от оттонор кыахтааҕын туһунан барыллааһын оҥоһуллубута. Үгүс улууска үүнүү куһаҕана суох буоллаҕына, былырыын сайын ходуһаларын ууга былдьаппыт Горнай уонна Кэбээйи улуустарыгар балаһыаньа бөрүкүтэ суоҕа этиллибитэ. Бырабыыталыстыба Бэрэссэдээтэлин солбуйааччы Михаил Никифоров бу улуустарга ууга сытар сирдээх хаһаайыстыбалар атын сиргэ сиргэ көһөн оттууру толкуйдуулларыгар, оттон атыттар бэйэлэрин сирдэрин сирийэн оттуулларыгар соругу туруорбута.

Бэс ыйыгар ардаан биэрэн, от үчүгэйдик үүнэн, үгүс хаһаайыстыбалар, сүрүннээн чааһынай ыаллар, окко бу ый саҥатыттан киирбиттэрэ.

– Үүнүү үчүгэй, билиҥҥитэ күн-дьыл да ама соҕус, – диир Бүлүү улууһун Халбаакы нэһилиэгин олохтооҕо Алексей Васильев. – Биһиги эргин өссө ааспыт нэдиэлэттэн хотуур тыаһаабыта. Ходуһаларга бугуллар бачыгыраһан эрэллэр, сорох ыаллар номнуо кэбиһиилэннилэр. Ол эрээри, халлаан хайдах эрэ былырыыҥҥытын батыһар курдук, итийэ-итийэ ардах кэлэ турар, ол иһин киһи быыстаан оттуур. От ыйын 10 күнүн кэнниттэн күүстээх ардах кэлиэ диэн дьиксинэбин, сир-уот тот турар буолан, ардах түстэр эрэ ходуһабыт уунан билгэйиэн сөп.