Сүрүн иһитиннэриини тыа хаһаайыстыбатын миниистирэ Александр Атласов оҥордо. Ыһыы үлэтин уонна оттооһуну кэмигэр, сөпкө тэрийэргэ сөптөөх үп көрүллүбүт. «Сиртэн үүнээйини ылыы» бырагыраама чэрчитинэн, муниципальнай бырагыраамалары үбүлээһиҥҥэ 356 мөл. солк., ол иһигэр өрөспүүбүлүкэ бүддьүөтүттэн 175 мөл. солк., 19 улуус уонна Дьокуускай куорат бүддьүөттэриттэн 181 мөл. солк. көрүллүбүт. Эмиэ бу бырагырааманан үп көрүллэн, хаһаайыстыбалар 159 үлэ тиэхиньикэтин, холбонор тэриллэри, 2 246 туонна ыһыы сиэмэтин атыыласпыттар, ону таһынан 266 км усталаах бүтэйи тута, 10 оту харайар ыскылааты, үс сиилэс траншеятын оҥоро сылдьар эбиттэр. Салгыы Амма, Горнай, Чурапчы, Ньурба, Сунтаар, Таатта, Нам, Мэҥэ Хаҥалас улуустарын баһылыктара, Дьокуускай куорат дьаһалтатын бэрэстэбиитэллэрэ оттооһун хаамыытын билиһиннэрдилэр.
Быйыл сайын 459 307 туонна от, 23 885 туонна сиилэс итиэннэ 12 876 туонна сенаж бэлэмнэниэхтээх. Кэмигэр ардаан, от эрдэ ситэн, хаһаайыстыбалар ходуһаҕа от ыйын бастакы күннэриттэн киирбиттэр. От ыйын 13 күнүнээҕи туругунан, өрөспүүбүлүкэ үрдүнэн 6 204 туонна от чөкөтүллүбүт, ордук үчүгэй көрдөрүүнү Нам (1 139 т.), Чурапчы (846 т.), Амма (833 т.), Мэҥэ Хаҥалас (735 т.), Хаҥалас (582 т.) ситиһэн иһэллэр. Былырыын сайын ходуһалара ууга былдьаммыт улуустарга (Эбээн Бытантайга, Кэбээйигэ, Дьааҥыга, Горнайга, Бүлүүгэ) быйыл да кэлэ-кэлэ ардаан, быһыы-майгы судургута суох эрээри, хаһаайыстыбалар ханна сир баарынан оттуу сылдьаллар.
Ил Дархан балаһыанньаны билсэн баран, бастатан туран миэстэҕэ оттуур соругу туруорунарга, ыраах учаастактарынан көһөн оттуур мобильнай биригээдэлэри өйөөһүнү күүһүрдэргэ эттэ.
– Өрөспүүбүлүкэ үрдүнэн үүнүү куһаҕана суох, онон туох ханнык иннинэ бэйэ сиригэр-уотугар сирийэн оттуур соругу туруорунуохха итиэннэ ыраах учаастактарга оттуур мобильнай биригээдэлэргэ улахан болҕомтону ууруохха, – диэтэ Айсен Николаев.
Андрей Сорокин (ЯСИА) хаартыскаҕа түһэриитэ
-
0
-
0
-
0
-
0
-
0
-
0
