Ол туһунан оччотооҕу улуус хаһыата суруйарынан, Николай Копырин салайар звенотун отчуттара үрдүк көрдөрүүлэри ситиспиттэрэ. Бастыҥ охсооччулар Ылдьаа Борисов (Оҕо Ылдьаа) уонна Мэхээлэ Охлопков (Күүстээх Мэхээлэ) «Биир күн -- сылы аһатар» диэн ыҥырыынан өрөспүүбүлүкэҕэ сураҕырбыттара. Үлэни-хамнаһы табыгастаахтык тэрийэн, онуоха эбии айылҕа үчүгэй хараҕынан көрөн, холкуос үлэтэ-хамнаһа өссө тахсан, бэрэссэдээтэл Василий Егоров «Балыкаарпабыс дуо?» – дэппитэ, Үлэ Кыһыл Знамята уордьанынан наҕараадаламмыта, холкуос өрөспүүбүлүкэ мөлүйүөннээх хаһаайыстыбаларын кэккэтин хаҥаппыта.
Таһаарыылаах үлэ бачыымын билиҥҥи көлүөнэ салҕыыр. Быйыл айылҕа үчүгэй хараҕынан көрөн, Уус Алдан улууһун отчуттара 6 932 туонна оту кэбиһэн, кыстыыр отторун 20 %-ын хааччыннылар. Маныаха лөгөйдөр киллэрбит кылааттара кырата суох. Нэһилиэк дьаһалтатын тыа хаһаайыстыбатыгар исписэлииһэ Геннадий Иванович оттооһун хаамыытын туһунан маннык кэпсиир:
– Быйыл былааммыт 2 187 туонна, онтон күн бүгүҥҥү туругунан 867 туоннаны чөкөттүбүт, ол эбэтэр былааммыт 39 %-ын толорон иһэбит. Элбэх сүөһүлээх-сылгылаах Анатолий Бурнашев, Иван Бурнашев уонна Пётр Кычкин салайар бааһынай хаһаайыстыбалара күүстээх үлэ үөһүгэр сылдьаллар. Петр Кычкин биригээдэтэ 50 туонна оттонно. Кэтэх ыаллартан Иннокентий Сысолятин 10 туоннаны оттоон, кыстыыр отун хааччынна. Дмитрий Прокопьевич эмиэ оччону оттоон, сылын быһаарда. Үүнүү үчүгэй, арай, үрэх сир өттө ууга сытара сорохтору атахтаата. Кырдьаҕас ыаллар сирдэрин аҥаарга оттотон, аҕыйах ынахтарын кыстыгын боппуруоһун быһааран, быйылгы сайыҥҥа махтаналлар.
Дьэ, ити курдук алаастарбыт үүнэннэр, дьон үөрэ-көтө күөх быйаҥы сомсоллор. Уолаттарын кытары нэһилиэккэ бастакынан оттоон бүтэн, алааһын саппыт Иннокентий Сысолятин түөрт ыанар ынахтаах. Астыыр сыах суох буолан, үүтүн туттарбат, ол оннугар үрүҥ ас арааһын астаан, күөх сайын кэлбит аатыгар оҕолорун, сиэннэрин дэлэччи аһатар уонна арыылаан хаһаанар. Үлэһит ыал биэнсийэлэригэр эбинэн төрүт аһы төрдүттэн тутарын киһи үөрэ истэр.
– Быйыл от үүнүүтэ олох үчүгэй! Биһиги Төбүрүөнтэн уонна Эбэттэн биэстии туоннаны ыллыбыт. Сааһырбыт киһи хамсаныахтаах, аҕаларбыт-эһэлэрбит уһун сайыны быһа харыларын күүһүнэн оттоон сордоноллоро уонна сайын дьолугар хотууру, кыраабылы саха киһитэ хайаан да тутуохтаах диэн үөрэтэллэрэ, – диир Иннокентий Иннокентиевич.
Ульяна Бурнашева, Лөгөй
-
3
-
0
-
1
-
0
-
0
-
0
