Күн бүгүн күөх быйаҥ күрэҕэр 11 129 араас мааркалаах тыраахтардаах, 10 089 звено, ол иһигэр 24 34 толору мэхэньисээссийэлээх, 41 66 ситэтэ суох мэхэньисээссийэлээх, 119 көлөнөн оттуур, 33 41 илиинэн оттуур звенолар, барыта 29 998 киһи үлэлии-хамсыы сылдьаллар. Үүнүү араас, улуустар бэйэлэрэ сабаҕалыылларынан, 403 901 туонна от бэлэмнэнэр туруктаах эбит, ити тиэрдиллибит былаан 87 %-а. Ити иһигэр, кыстыыр отторун Эбээн Бытантай 39 %-ын, Бүлүү 61 %-ын, Чурапчы, Дьааҥы, Кэбээйи, Өймөкөөн, Өлүөхүмэ, Усуйаана, Чурапчы 65-80 %-ын хааччынар кыахтаахпыт дэһэр эбиттэр. Онтон атыттар былааннарын толорорго эрэллээхтэр.
Тиийбэт оту хааччынар туһуттан мобильнай биригээдэлэри тэрийэн, ыраах сытар учаастактарга оттуур сорук турар. Билиҥҥитэ 27 мобильнай биригээдэ тэриллэн, 1 350 туонна от бэлэмнэммит. Холобур, Горнай улууһугар тэриллибит сэттэ мобильнай биригээдэ холбоон 310 туоннаны, Орто Халымаҕа тэриллибит биир мобильнай биригээдэ 30 туоннаны оттообуттар.
Билигин 145 мобильнай биригээдэ эбии тэриллэн эрэр, кинилэр чугастааҕы сирдэрин оттоон бүтэрдэхтэринэ, ыраах учаастактарга, үрэх бастарыгар көһөн оттуохтаахтар. Өрөспүүбүлүкэ үрдүнэн тоҕус улуустан барыта 172 мобильнай биригээдэ тэриллиэхтээх, кинилэр мантан күһүн барыта холбоон 15 991 туоннаны оттуур сорудахтаахтар. Тыа хаһаайыстыбатын министиэристибэтэ бу хайысханан, сүөһү дорохой аһылыгын саппаас пуондатын тэрийии чэрчитинэн, 14 мөл. 454 тыһ. солкуобай харчыны көрөргө былаанныыр.
Илии хотуурунан!
Былырыын Бүлүү эҥээр, Горнай, Кэбээйи, Эбээн Бытантай уонна Дьааҥы улуустарыгар элбэх ходуһа сирэ ууга барбыта, быйыл ол уу син түһэн, оттотон эрэр. Оттон киин уонна илин эҥээр улуустар хаһаайыстыбалара наар тиэхиньикэнэн оттуур буоланнар, мөлтөх үүнүүлээх, кытыы сирдэр сэтиэнэххэ былдьаналлара баар суол.
Дьэ ити иһин, быйыл илии хотуурунан сирийэн оттуур сорук күүскэ туруорулунна. Кэккэ улуустар дьаһалталара бэйэлэрин бүддьүөттэриттэн «Штиль» курдук мотуордаах хотуурдары атыылаһарга үп көрдүлэр. Холобур, былрыын сүрүн ходуһаларын ууга былдьаппыт Кэбээйи хаһаайыстыбалара мотуордаах хотууру атыыласпыт ороскуоттарын 50 %-ын олохтоох дьаһалта уйуммута, быйыл эмиэ итинник өйөбүлү оҥордо.
«Күүлэйдэр»
Урукку сыллар үгэстэрин сөргүтэн, кураан дьылларга уонна пандемия кэмигэр тохтуу сылдьыбыт «Күүлэй», оту илиинэн охсуу күрэхтэһиитэ элбэх улууска ыытылынна. Ол курдук, ааспыт өрөбүл күннэригэр хаҥаластар уонна мэҥэ хаҥаластар «күүлэйдээннэр», дьон-сэргэ биһирэбилин ыллылар. Мэҥэ Хаҥалас улууһун «Күүлэйигэр» ыраах Белоруссияттан биир эдэр ыалдьыт кэлэн холосто, саха илиитинэн оттуур үгэһин билистэ.
Атырдьах ыйын 10-11 күннэригэр Таатта улууһун Уолба нэһилиэгэр «Уолба» тыа хаһаайыстыбатын потребительскэй кэпэрэтиибин өр сылларга салайбыт Николай Соломонов кэриэһигэр уонна Алексей Кладкин оту охсууга рекорд олохтообута 85 сылыгар анаммыт өрөспүүбүлүкэтээҕи «Күүлэй-23» ыытылынна. («Сокольников күүһэ» холкуос чилиэнэ Алексей Иванович Кладкин 1938 сыллаахха, от ыйын 26 күнүгэр 5,16 гектар сири охсон, күннээҕи былаанын 700 % толорбута, Таатта улууһугар оту охсууга рекорд олохтообута). Онно улуустардааҕы күрэхтэһиилэргэ бастаабыт хоннохтоох охсооччулар кэлэннэр, күрэхтэстилэр.
«Сайыҥҥы биир күн дьылы аһатар» диэн мээнэҕэ этиллибэт. Туран биэрбит күннэри өрүсүһэннэр, хаһаайыстыбалар дьэ бу курдук үлэ араас ньымаларын туһананнар, төрүт үгэс буолбут «Күүлэйи» уонна ыраах баран оттуур мобильнай биригээдэлэри тэрийэннэр, кэлэр кыстыкка сөп буолар оту хааччыйар туһугар сыралаһан үлэлии сылдьаллар.
-
3
-
0
-
0
-
0
-
0
-
0
