– Урут, сопхуос саҕана, биһиги хас эмит тыһыынчанан туонна сиилэһи угар этибит. Биһиги нэһилиэкпит олохтооҕо, Үөһээ Бүлүү улууһун бочуоттаах гражданина, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Арассыыйа бочуоттаах пиэрмэрэ Уйбаан Барчахов билигин сиилэһинэн дьарыктанар соҕотох хаһаайыстыба буолар. Кини бииргэ төрөөбүт быраата Михаиллыын сүүс сылгылаах, ол иһигэр 66 биэлээх. Сылгыларын аһылыгын хааччынар гына 150 туонна үчүгэй хаачыстыбалаах оту бэлэмнээбиттэрэ.
Билигин сиилэстээһиҥҥэ туруннулар. Саас 100 гектардаах бааһынаҕа күөх маассаны ыспыттара бэркэ үүннэ, 450 туонна сиилэһи угар былааннаахтарын күн-дьыл туран биэрдэҕинэ, аһара толорор санаалаахтар. Уйбаан Михайлович уола, Саха Өрөспүүбүлүкэтин тыатын хаһаайыстыбатын туйгуна Семен Барчахов бааһынай хаһаайыстыбатын тэринэн, таһаарыылаах үлэтинэн-хамнаһынан улууска уонна өрөспүүбүлүкэҕэ киэҥник биллэн иһэн, ыалдьан олохтон туораабыта. Уйбаан Михайлович уолун кэриэстээн, кини хаһаайыстыбатын ыспакка, салгыы сайыннарар туһугар үлэлии-хамсыы сылдьара махталлаах. Кэлэр өттүгэр бааһынатын кэҥэтэн, сүөһү сүмэһиннээх аһылыгын базатын хаҥатыыга өссө күүскэ ылсан үлэлиир былааннаах. Төһө даҕаны саас ылан истэр, бу Уйбаан Михайлович курдук туруу үлэһит дьонноох буоламмыт, өбүгэбит саҕаттан төрүт дьарыкпытын, ынах сүөһүнү уонна сылгыны иитиини, сайыннара сылдьабыт. Соторутааҕыта биһиэхэ М.К. Аммосов аатынан ХИФУ уонна АГАТУ преподавателлэрэ Луиза Бэстиинэбэ, Ольга Парфенова, Антон Ванчулин сылдьаннар, Барчаховтар бааһыналарын үүнүүтүн көрдүлэр-иһиттилэр, хаһаайыстыба үлэтин-хамнаһын билистилэр.
Степан Дмитриев, Балаҕаннаах нэһилиэгин дьаһалтатын баһылыга, Саха Өрөспүүбүлүкэтин норуотун хаһаайыстыбатын үтүөлээх үлэһитэ.
-
0
-
0
-
0
-
0
-
0
-
0
