Аныгы үйэ сүпсүлгэнэ, араас араллаана үгүс. Бары өйдүүрбүтүнэн, 2020 с. коронавирус дьаҥа туран, элбэх киһи бу ыарахан ыарыынан ыалдьан, сорохторо өрүһүллэн күн бүгүн дьонун-сэргэтин кытта этэҥҥэ сылдьар. Былыр да, быйыл да айылҕалаахтарбыт өрүһүлтэ буолан, бу да ыарыыттан быыһаатылар. Нам улууһун Никольскай сэлиэнньэтигэр олорор Александр Саввич Эверстовы-Алгыстаах Өлөксөөндүрү бары да тэлэбиисэринэн көрөн, араадьыйанан истэн, хаһыаттарга ааҕан, сэҥээрэ билсибиппит. Күн бүгүн киниэхэ бары улуустартан кэлэн эмтэнэллэр. Ааспыт субуотаҕа норуот эмчитин ыра оҥостубут баҕата туолан, дьонун-сэргэтин эмтиир балаҕана тутуллан бүтэн, үлэҕэ киирдэ.
Бу көрдөххө дьоҕус эрээри, сүҥкэн үлэ ыытыллар балаҕанын үөрүүтүн үллэстэ Нам улууһун баһылыгын солбуйааччыта Петр Васильевич Абрамов кэлэн улуус дьаһалтатын аатыттан истиҥ эҕэрдэтин тиэртэ.
Никольскай сэлиэнньэтин бас-көс баһылыга Алексей Карлович Кривогорницын алгыс этэн, сахалыы сайаҕастык эҕэрдэлээтэ. Мустубут ыалдьыттар саҥа сырдык балаҕаҥҥа эмчит эмтээбит үтүөтүн үөрэ-көтө сэһэргээтилэр.
Дьоро күн үөрүүтүн үрдэтэн, Москва куораттан Норуот эмчиттэрин ассоциациятыттан улахан сэртипикээт уонна Махтал суруктаах мэтээл кэлбитэ туттарылынна. Бу улахан бэлиэ үгүс киһини эмтээн үтүөрдүбүт уонна эмтииригэр ураты ньыманы туттар эмчиттэргэ туттарыллар эбит. Биһиги Сахабыт сирин биир сэлиэнньэтигэр маннык сүдү айылҕалаах киһи олороруттан киэн туттабыт. Александр Саввич эмтиир ньыматын, үгүс араас ыалдьыбыт, быраастар аккаастаммыт да дьоннорун эмтээн, олох үөрүүтүн бэлэхтээбитин Арассыыйа улахан эмчиттэрэ билиммиттэр.
Саха киһитин ураты хаачыстыбатынан кини сэмэйэ, үлэһитэ, чиэһинэйэ буоллаҕа. Александр Саввич уйадыйан, бар дьонун доруобай буолуохтарын баҕарарын туһугар, сыралаһан үлэлиирин киһи сөҕөр эрэ. Кини өбүгэлэрэ биэрэр ураты күүстэрин, алгыстарын бар дьонугар тиэрдэр, үтүө уйан санаатынан элбэх киһиэхэ күн сырдыгын көрдөрөн, өлүүттэн да быыһаабыт дьонноро күн бүгүн махталларын кэпсииллэр, тиэрдэллэр. Маннык үтүө эмчит киһибитин, күн курдук харыстаан, кини эппит сүбэтин толору ылынан, истибит алгыспытын бэйэбитигэр иҥэринэн сылдьыаҕын.
Саргылаах сахам сиригэр, дьоммут этэҥҥэ буолуҥ, чэгиэн буолуҥ диэн алгыстаах Өлөксөөндүр эппит тыла туолан иһиэхтин!
- 4
- 0
- 0
- 0
- 0
- 0