Ол курдук, кыһыл көмүс мэтээлинэн бэлиэтэннилэр: племенной уонна табаарынай сүөһүнү иитиигэ үрдүк көрдөрүүлэрин иһин -- «Бөтүҥ» уонна И.Я. Строд аатынан кэпэрэтииптэр (иккиэн Амма улууһуттан), «Хорообут» ХЭТ (Мэҥэ Хаҥалас улууһа), И.В. Николаев-Бытык Уйбаан аатынан «Күндээдэ» АУо (Ньурба улууһа), «Бөртө сылгы собуота» (Хаҥалас улууһа); астыыр салааҕа – «Дүпсүн» кэпэрэтиип (Уус Алдан улууһа), «Саха сүөһүтэ» генопуонда хаһыанай тэрилтэтэ, В.Ф. Кабохин аатынан «Сибирь» сибиинньэ иитэр комплекс бааһынай хаһаайыстыба (Дьокуускай к., Марха) оҥорон таһаарбыт бородууксуйалара.
М.Г.Софронов аатынан ТХНЧИ учуонайдара «Тыа хаһаайыстыбатыгар инновацияны ситиһиилээхтик киллэрии иһин», «АПК-ны көдьүүстээх сүбэлэринэн хааччыйыы иһин» номинацияларынан 7 кыһыл көмүс, 3 үрүҥ көмүс, 1 боруонса мэтээли ылары ситистилэр.
Племенной уонна табаарынай сүөһүнү иитиигэ үрдүк көрдөрүүлэрин иһин үрүҥ көмүс мэтээлинэн «I Күүлэт» кэпэрэтиип (Бүлүү улууһа) уонна «Ил-Тосхол» кэпэрэтиип (Сунтаар улууһа), боруонса мэтээлинэн «Мастаах» кэпэрэтиип (Бүлүү улууһа) бэлиэтэннилэр. АГАТУ таһаарар «АГАТУ сонуннара» диэн научнай сурунаала үрүҥ көмүс мэтээл хаһаайына буолла.
Агрооскуолалар 10 кыһыл көмүс, 6 үрүҥ көмүс, 1 боруонса мэтээли аҕаллылар.
«Саха Өрөспүүбүлүкэтин Наукаларын академията» судаарыстыба бүддьүөтүн тэрилтэтэ бэчээттээн таһаарбыт «Табаһыт ыйынньыга», «Балыктааһын үгэс буолбут көрүҥэ», «Төрт олохтоох хотугу омуктар бырааптарын мэктиэлээһин» диэн анаарыылаах матырыйааллара уонна «АПК-ны ресурсанан хааччыйыы киинэ» судаарыстыба бүддьүөтүн тэрилтэтин анал сайта боруонса мэтээлэринэн бэлиэтэннилэр.
- 0
- 0
- 0
- 0
- 0
- 0