Күөх хонууну көрөн турар 12 этээстээх отельга араас категориялаах 150 нүөмэр баар буолуоҕа, ону таһынан, эрэстэрээн, фитнес-киин, дьыалабыай көрсүһүүлэри ыытар саала аһыллыаҕа.
Ол туһунан сэтинньи 13 күнүгэр СӨ урбааны уонна туризмы сайыннарарга туһуламмыт судаарыстыбаннай бырагыраама түмүгүн көрөр-истэр бырабыыталыстыба чааһыгар СӨ урбааҥҥа, атыыга-эргиэҥҥэ уонна туризмҥа миниистирин солбуйааччы Максим Карбушев иһитиннэрдэ.
2022 с. Саха Сиригэр 237 000 турист сылдьыбыт, быйыл ити көрдөрүү 300 000 диэри улааппыт. Кэлэр сылларга турист ахсаанын 1 мөл. диэри улаатыннарар санаалаахтар.
Аны сайын «Азия оҕолоро» аан дойдутааҕы спортивнай оонньуу ыытыллыаҕа, оттон Дьокуускайга аныгы олох ирдэбилигэр эппиэттиир саҥа гостиница тутуллубатаҕа ыраатта.
Онуоха Ил Түмэн доруобуйаҕа харыстабылын кэмитиэтин бэрэссэдээтэлэ Светлана Давыдова Саха Сирин бренд быһыытынан аан дойдуга аатырдар ытык сирдэрбитигэр: тымныы муҥутуур сиригэр Өймөкөөҥҥө, Киһилээх хайатыгар толору хааччыллыылаах гостиница тоҕо баччааҥҥа диэри тутулла илигин токкоолосто.
Кини этэринэн, үгүс туристар тоһуттар тымныыны, Киһилээх хайаларын көрө бараллар эрээри, анараа аныгы олох сиэринэн үчүгэй гостиница суоҕа туризм сайдарын атахтыыр.
Хаартыска: отель ойуута «РИК плюс»
-
0
-
0
-
0
-
0
-
0
-
1
