Антонина Григорьева мунньаҕа аһарыгар РФ Бэрэсидьиэнэ туруорбут тутаах соруктарын санатта: "Сокуону оҥоруу кэм ирдэбилигэр толору сөп түбэһиэхтээх. Биһиги кыраасданнар көҕүлээһиннэрин көҕүлүүргэ, уопсастыба көрдөбүллэригэр суһаллык эппиэттииргэ уонна үлэбитин норуокка аныырга эбээһинэстээхпит», — диэн кэмитиэт бэрэссэдээтэлэ тоһоҕолоон бэлиэтээтэ.
Мунньах бэбиэскэтин сүрүн боппуруоһунан «СӨ Үөрэҕин туһунан» сокуонун 2-с ыстатыйатыгар уларытыыны киллэрии туһунан 433-7 №-дээх сокуон бырайыага буолла. Докумуон эрэгийиэннээҕи сокуону «РФ үөрэҕириитин туһунан» федеральнай сокуоҥҥа сөп түбэһиннэрэр сыалтан (310-ФЗ №-дээх федеральнай сокуон ылыллыытынан сибээстээн) оҥоһулунна.
Антонина Григорьева быһаарбытынан, урут үөрэх тэрилтэлэрэ бэйэлэрин бүддьүөттэриттэн сибээс өҥөтүн төлүүллэрэ кинилэргэ үп-харчы ноҕуруускатын үөскэтэрэ. РФ Бэрэсидьиэнэ Владимир Путин сорудаҕынан, 2026 сылтан саҕалаан Российскай Федерация субъектара оскуолаларга уонна кэллиэстэргэ эрэгийиэннээҕи бүддьүөт суотуттан биир кэлим ситимҥэ (ЕСПД) уонна интэриниэти туһаныыны кииннээн хааччыйыахтаахтар.
РФ Сыыппараҕа сайдыыга, сибээскэ уонна маассабай коммуникацияҕа министиэристибэтин ааҕыытынан, Саха Сирин бүддьүөтүн бу сыалга ороскуота бачча буолар:
- - 2026 сылга — 223 023 488 солк. (сибээһи хааччыйарга 736, кэлин 741 үөрэх тэрилтэтигэр тиийэ кэҥэтэргэ);
- -2027 сылга -- 224 080 328 солк. (748 үөрэх тэрилтэтигэр).
Бу өҥөнү 2026 уонна 2027 сылларга толорооччунан РФ Бырабыыталыстыбатын быһаарыытынан «Ростелеком» ПАУо буолар. СӨ Үөрэҕин уонна билимин министиэристибэтин уонна тустаах сибээс эпэрээтэрин икки ардыларыгар судаарыстыбаннай хантараак быйыл кулун тутар 31 күнүгэр түһэрсиллибит.
Быйылгы тустаах үбүлээһин СӨ Бырабыыталыстыбатын 152-р №-дээх дьаһалыгар сөп түбэһиннэрэн бүддьүөттэн үбүлээһини хаттаан үллэрии суотугар хааччылынна. 2027-2028 сыллардааҕы былааннаах кэмҥэ эбии наадыйыы «Смарт-ПРО» бырагырааматыгар киллэриллэн, өрөспүүбүлүкэ үөрэҕин сайыннарыы судаарыстыбаннай бырагырааматын чэрчитинэн төлөнүллүөҕэ.
Сокуон барыла СӨ Бырабыыластыбатыттан, СӨ Борокуратууратыттан, Ил Түмэн аппараатын судаарыстыбаннай быраапка управлениетыттан уонна РФ Юстицияҕа министиэристибэтин Саха Сиринээҕи управлениетыттан үчүгэй түмүктэри ылла. Дьүүллэһии, кэпсэтии түмүгүнэн тустаах сис кэмитиэт чилиэннэрэ СӨ Судаарыстыбаннай Мунньаҕын (Ил Түмэн) кэлэр пленарнай мунньаҕар сокуон бырайыагын бастакы ааҕыыга ылынарга бары биир санаанан быһаарыы ылыннылар.
Матырыйаал Ил Түмэн пресс-сулууспатын матырыйаалынан оҥоһулунна.
Хаартыскаҕа Василий Кононов түһэриилэрэ.
-
0
-
0
-
0
-
0
-
0
-
0
