Кэбээйи улууһун почтатын начаалынньыга, Сангаар олохтооҕо Афанасий Полятинскай ааспыт саас, өрүс эстэр кэмигэр, хас да күн барбакка мунньуллубут 100-чэкэ киилэ ыйааһыннаах хаһыаты, сурунаалы санныгар сүгэн, 350 км сатыы хааман, уустук суоллаах-иистээх кытыы сытар 10 нэһилиэккэ түҥэппитин туһунан сонун былырыын өрөспүүбүлүкэни биир гына тилийэ көппүтэ.
Үлэтигэр бэриниилээх эр бэрдин бары хайҕаан суруйбуттара, киэҥ эйгэҕэ таһаарбыттара. Ол үтүө холобурун сыаналаан, Арассыыйа почтатын генеральнай дириэктэрэ Максим Акимов киниэхэ хампаанньа саамай үрдүк наҕараадатын туттарда.
-- Улахан дьоруойдуу быһыыны оҥорбут курдук санаммаппын. Үөскээбит кыһалҕаны итинник эрэ быһаарар кыах баара. Дьиҥэр, дьаһалта вездеходунан барар былааннаҕым. Онтукам өрөмүөҥҥэ турар буолан биэрбитэ. Сөмөлүөт да көппөтө, түһэр сирдэрэ халаан уутугар былдьанан. Оттон биэнсийэни кэмигэр тириэрдэр булгуччулаах этэ. Дьону аһыыр харчылара суох хаалларыаҥ үһү дуо? Ол иһин 97 кг диэри ыйааһыннаах корреспонденцияны сүгэн, онно эбии саабын кыбынан, астаах-таҥастаах малбын тутан, ыраах айаммар туруммутум. Сангаартан Кальвицаҕа диэри өрүһүнэн 30 килэмиэтири тобукпар диэри ууну кэһэ сылдьан хаампытым. Саатар, ол күн тыал бөҕө этэ, инчэҕэй хаар түһэрэ. Туох да көстүбэт тумарыга, муна сыспытым. Ыксаан салгыҥҥа саанан ыппыппар, хата, булчуттар хардаран ыппыттара. Онон эрэ кытылы булбутум. Кинилэргэ хонон, сэниэ ылбытым. Тыа устун барарга эһэ-бөрө кэлиэ диэн сэрэхэчийэҕин. Ол эрээри ордук дьонтон куттанарым. Биэнсийэ харчытын илдьэ баран иһэр буоллаҕым дии. Онон саабын көмүскэнэргэ ыксабар тута сылдьыбытым. 10 күн хааман, саамай түгэх сытар Сайылыккка тиийбитим. Ол тухары иккитэ эрэ ороҥҥо сытан утуйан ылбытым. Бу үрдүкү наҕараада мин эрэ ситиһиим буолбатах. Дойдум дьонун көмөтө эмиэ баар. Дэриэбинэҕэ тиийдэхпинэ, тиэхиньикэ төһө тиийэринэн илдьэн биэрэллэрэ: ардыгар 2 км, ардыгар 10 км, -- диэн кэпсиир Афанасий Полятинскай.
Афанасий Кэбээйи Тыайатыттан төрүттээх. Икки үрдүк үөрэхтээх. ХИФУ автодорожнай уонна юридическай факультеттарын бүтэрбит. Эдэр киһи куоракка хаалар кыахтааҕын үрдүнэн, төрөөбүт дойдутун булдун-аһын ахтан, улууһун сайдыытыгар бэйэтин кылаатын киллэрээри, Сангаарга үлэлии барбыт. Билигин сааһа 28-һа, кэргэннээх, 3 кэрэчээн кыыс оҕолоох. Улахана быйыл оскуолаҕа киирэр.
-
0
-
0
-
0
-
0
-
0
-
0
